ԱՄՆ նախագահ Դոնալդ Թրամփը Մերձավոր Արևելքը «նողկալի տեղ» է անվանել՝ մեկնաբանելով լրագրող Ջամալ Հաշոգի մահը և Իրանում մարդու իրավունքների ոտնահարումները։ Այս մասին հաղորդում է The Hill-ը։
«Չկա արդարացում նրան, ինչ տեղի ունեցավ Սաուդյան Արաբիայում։ Ոչ մի արդարացում… Դուք միայն տեսեք, սա աշխարհի անբարենպաստ մասն է։ Սա նողկալի տեղ է։ Սա աշխարհի նողկալի հատվածն է»,– ասել է նախագահը լրագրողներին՝ օվալաձև աշխատասենյակում։
«Եթե դուք նայեք մյուս կողմին՝ Իրանին, ապա կտեսնեք, որ նրանք մարդկանց շատ արատավոր և սարսափելի բաներ են արել»,– հավելել է ԱՄՆ նախագահը։
«Սակայն, եթե տեղի է ունեցել այն, ինչ տեղի է ունեցել ու, եթե փաստերը ստուգվում են, նշանակում է՝ դա շատ վատ է»,– ասել է Թրամփը։
Թրամփը, այնուամենայնիվ, պաշտպանել է Սաուդյան Արաբիային, այդ երկիրը «շատ լավ դաշնակից» անվանելով և հավելելով, որ նրանք «շատ են օգնել մեզ Իսրայելի հարցում։ Նրանք շատ բաներ են ֆինանսավորել»։
Հիշեցնենք, որ Հաշոգին անհետացել էր Ստամբուլում, հոկտեմբերի 2-ին։ Թուրքական իշխանությունները պնդում էին, որ սաուդյան գործակալները սպանել և անդամատել են լրագրողին։ Սաուդյան Արաբիան մինչև վերջին պահը հերքում էր մահվան փաստը, մինչև որ չխոստովանեց, որ Հաշոգին պատահաբար է մահացել՝ ծեծկռտուքի ժամանակ։
ԱՄՆ–ն և եվրոպական երկրները գտնում են, որ Էր–Ռիյադը թաքցնում է մահվան մասին ճշմարտությունը և պահանջում են շարունակել հետաքննությունը։
