Այս օրերին Երևանում ընթանում է բռնցքամարտի Հայաստանի առաջնությունը, որը արդեն իսկ կարելի է համարել սկանդալային: Հիշեցնենք, որ հայկական բռնցքամարտը բաժանվել է երկու թևերի: Վստահ լինելով, որ Արթուր Գևորգյանը Հայաստանի բռնցքամարտի ֆեդերացիայի նախագահ է ընտրել ապօրինի բռնցքամարտի մի խումբ գործիչներ հիմնել է այսպես ասած այլընտրանքային ֆեդերացիա: Գևորգյանի դուրս եկած բռնցքամարտիկներն ու մարզիչները պահանջում են ֆեդերացիայի նախագահի նոր ընտրություն:
Օրեր առաջ ՀՀ և ՀՀ սպորտի և երիտասարդության նախարարությունը պաշտոնական հայտարարությամբ էր հանդես եկել և առաջարկել հանգուցալուծման տարբերակ: «Հայաստանի «Հաշվի առնելով Հայաստանի բռնցքամարտի ֆեդերացիայի (ՀՀԲՖ) նախագահի 02.08.2018 թ. կայացած ընտրություններից հետո Հայաստանի բռնցքամարտի ներկայացուցիչների կազմակերպած բողոքի ակցիաները և ՀՀ սպորտի և երիտասարդության հարցերի նախարարի պաշտոնակատար Գաբրիել Ղազարյանի՝ «Հայաստանի Հանրապետության բռնցքամարտի ֆեդերացիա» ՀԿ-ի և «Բռնցքամարտի հայկական ազգային ֆեդերացիա» ՀԿ-ի նախագահների հետ ունեցած անձնական հանդիպումները՝ ՀՀ սպորտի և երիտասարդության հարցերի նախարարությունն ուսումնասիրել է ստեղծված իրավիճակը և այն հանգուցալուծելու նպատակով առաջարկում է կազմակերպել և անցկացնել ԱԻԲԱ-ի կանոնադրությանը և ԱԻԲԱ-ի կանոններին (հոդված 37) համապատասխան ՀՀԲՖ-ի նախագահի նոր ընտրություններ՝ հաշվի առնելով Հայաստանի բռնցքամարտի բոլոր ներկայացուցիչների (ԱԻԲԱ-ի կողմից կազմակերպված միջազգային մրցաշարերին մասնակցած մարզիչներ, մարզիկներ, բռնցքամարտի վետերաններ) իրավունքներն ու շահերը և բոլորին ծանուցել ֆեդերացիայի նախագահի նոր ընտրությունների անցկացման օրակարգի, վայրի և ժամի մասին` խստորեն պահպանելով ՀՀԲՖ-ի կանոնադրության 4.2.1, 4.2.2, 10.3.3 և 10.5.3 կետերի դրույթները», ասված էր հայտարարության մեջ: Նշենք սակայն, որ նոր ընտրությունների անցկացման հեռանկարը այս պահին դեռևս տեսանելի չէ: Ավելին երեկ աղմկահարույց հայտարարությամբ հանդես եկավ Արթուր Գևորգյանը:
Վերջինի խոսքով` բռնցքամարտի մյուս ֆեդերացիան կաշառք է առաջարկել մարզիկներին, որ չմասնակցեն Հայաստանի առաջնությանը. «Այս կերպ այդ ֆեդերացիան պարզապես կործանում է, այդ երեխաների ապագան: Այս առաջնությանը չի մասնակցում Նարեկ Մանասյանը: Նրա հետ կապված մեր ֆեդերացիան բացառիկ ներդրում ունի: Ես հասկանում եմ, որ այդ քաշային կարգում լուրջ մրցակցություն կա և գուցե վախն է պատճառը նրա չմասնակցության: Որևէ այլ ֆեդերացիա, բացառությամբ այսօր Հայաստանի առաջնությունն անցկացնող ֆեդերացիայի, կապ չունի սիրողական բռնցքամարտի հետ: Լավ երևույթ չէ, որ նույն մարզաձևի երկու ֆեդերացիա կա, դրա արդյունքում կորչում է որակը: Բայց եթե մարզիկներն ուզում են մասնակցել աշխարհի, Եվրոպայի առաջնություններին, կամ Օլիմպիական խաղերին միակ ճանապարհը Հայաստանի բռնցքամարտի ֆեդերացիան է և այս առաջնությունը»,- նշել էր Գևորգյանը: Հայաստանի բռնցքամարտի ֆեդերացիայի նախագահի կողմից սա ըստ էության հաղորդում է հանցագործության մասին: Կաշառքի դիմաց մարզական միջոցառմանը չմասնակցելը ոչ միայն սպորտային այլև քրեական հանցագործություն է: Առաջնությունը կարելի է բոյկոտել, բայց տեղի ունեցող զարգացումները ոչ միայն մտահոգիչ են, այլև կարող են կործանարար հետևանք ունենալ: Միայն այլընտրանքային ֆեդերացիա ստեղծումը կարող է վերջնական հարված հասցնել հայկական բռնցքամարտին: Բնական է, որ ԱԻԲԱ-ն հետևում է մեր երկում ծավալված իրադարձություններին և խնդիրը չկարգավորելու դեպքում կարող է կտրուկ որոշումներ կայացնել: Ընդհանուր հայտարարի չգալու դեպքում ԱԻԲԱ-ն կարող է լուրջ պատժամիջոցների դիմել՝ ընդհուպ մինչև Հայաստանի հավաքականների որակազրկում: Դա ոչ միայն կհեղինակազրկի հայկական բռնցքամարտը, այլև հայկական սպորտը:
Խնդիրը միայն ու միայն պետք է կարգավորվի բանակցությունների արդյունքում: Կրկին պետք է նշել, որ այս պահին ամենավտանգավորը նոր ֆեդերացիայի գոյությունն է: Նշենք նաև, որ խնդրի կարգավորման գլխավոր պատասխանատուներն են Արթուր Գևորգյանը և սպորտի նախարարն, ինչպես նաև ՀԱՕԿ-ի նախագահ Գագիկ Ծառուկյանը: Հիշեցնենք, որ Գևորգյանը հայտարարել էր, որ մտադիր է առաջադրվել ՀԱՕԿ նախագահի պաշտոնում. «Եթե ես նախկինում տարակուսում էի ՀԱՕԿ նախագահի պաշտոնում 2020 թվականին իմ թեկնածությունը դնելու հարցում, ապա այսօր հայտարարում եմ, որ ես դնելու եմ թեկնածությունը ՀԱՕԿ նախագահի պաշտոնում», -նշել էր Գևորգյանը: Այս հայտարարությունը խոսում է այն մասին, որ Գևորգյանը մտադիր չէ զիջել դիրքերը: Ավելին, Հայաստանի բռնցքամարտի ֆեդերացիան՝ ի դեմս Գևորգյանի, մարտական է տրամադրված: Փոխզիջումների գնալուն կարծես հակված չէ նաև Ծառուկյանը:
Մարզաձևով սրտացավ մարդկանց մնում է հորդորել անհապաղ միջոցներ ձեռնարկել կոնֆիլկտը հարթելու համար, ինչը կնպաստի մարզաձևի աշխատանքների բնականոն ընթացքին: Ամենևին ցանկալի չի լինի, որ խնդրին ստիպված լինեն միջամտել միջազգային կառույցները:
