Արմավիրի մարզի Արշալույս գյուղում համայնքի ղեկավար Զարզանդ Գրիգորյանի պաշտոնանկության հետ կապված ստորագրահավաք է սկսվել, երկու օրվա մեջ 800-ից ավելի ստորագրություն է հավաքվել։ Այս մասին «Առաջին լրատվական»-ի հետ զրույցում ասացին արշալույսցիները։
Հիշեցնենք, որ օրեր առաջ վարչապետ Նիկոլ Փաշինյանը Արմավիր գնալիս եղել էր նաև Արշալույս գյուղում, որտեղ գյուղացիները վարչապետից պահանջել էին «ավարտին հասցնել հեղափոխությունը Արշալույսում և հեռացնել գյուղապետին»։ Վարչապետն էլ ասել էր, որ ինքը չի կարող հեռացնել ընտրված ղեկավարին, ընտրովի պաշտոն զբաղեցնողին։ Եվ եթե գյուղացիները ցանկանում են հեռացնել գյուղապետին, ապա պետք է հավաքեն ընտրողների մեծամասնության ստորագրությունները և դրանք ներկայացնեն կառավարություն։ «Վարչապետը ոնց ասել, այդպես էլ անում ենք։ Վարչապետը կհամոզվի, որ գյուղացիների մեծամասնությունը չի ուզում գյուղապետը մնա։ Մի քանի օրվա մեջ ավելի շատ ձայն կհավաքվի ու մենք այդ ստորագրությունները կներկայացնենք կառավարություն, ոնց վարչապետն ասել է»,- «Առաջին լրատվական»-ի հետ զրույցում ասաց արշալույսցիներից մեկը՝ հավելելով, որ եթե այս եղանակով էլ չհաջողվեց ազատվել Զարզանդ Գրիգորյանից, ապա իրենք բոլորով գնալու են կառավարության դիմաց ու տուն չեն վերադառնալու՝ մինչև գյուղապետը հրաժարական չտա։ Արշալույսցիները զարմանում են՝ ինչու Ուրցաձորում գյուղապետը ճնշման տակ հրաժարական տվեց, իսկ Գրիգորյանը դեռ համառում է ու դրանից հետևություն են անում, որ Զարզանդ Գրիգորյանը վայելում է կառավարության հովանավորությունը։ «Մարդու վրա երեք քրեական գործ կա։ Որտեղ եք տեսել, որ ըտենց մարդը շարունակի մնալ գյուղապետ։ Արդարություն չկա»,- դժգոհեց մեր զրուցակիցը։
Գյուղացիներից մեկ ուրիշի խոսքերով էլ՝ անգրագետ մարդը չի կարող գյուղապետ աշխատել, իսկ Զարզանդ Գրիգորյանը անգամ չգիտի՝ ինչպես է գրվում մեծատառ «Զ» տառը։
Գյուղացիներից մեկն էլ հայտնվել էր անմիջապես Գրիգորյանի հալածանքների տակ։ Զարզանդ Գրիգորյանը խոստացել է, որ այդ ընտանիքը սովից պետք է մեռնի ու այդպես էլ վարվել է՝ արգելելով ընտանիքին գյուղում զբաղվել հողագործությամբ, առևտրով և այլ աշխատանքներով։
Արշալույսցիները վճռական են տրամադրված և պնդում էին, որ պայքարելու են մինչև վերջ, մինչև գյուղն ազատվի Զարզանդ Գրիգորյանից։
Առավել մանրամասն՝ տեսանյութում։
