Հանրապետությունում հաստատված վիճակը լավագույններից չէ, անցած տարին այնքան էլ հեշտ չէր: Այսօր տեղի ունեցած մամուլի ասուլիսի ժամանակ այս մասին ասաց տնտեսագետ, ԱԺ նախկին պատգամավոր Վարդան Բոստանջյանը:
«Տնտեսական առկա վիճակին մենք ակնհայտորեն պատրաստ չէինք: Սոցիալական դժվարությունները ողբերգություն չեն, սակայն պետք է հասկանանք, որ շուտափույթ պետք է դուրս գանք այս վիճակից: Մենք նահանջելու տեղ այլևս չունենք, և ուզում եմ մտածել, որ այս տարի պետք է արդյունավետ գործենք»,- ասաց նա՝ հավելելով, որ իշխանությունները, թեկուզ աստիճանաբար, պետք է գազի սակագնի իջեցման գնան:
Անդրադառնալով կուտակային կենսաթոշակային համակարգին՝ նախկին պատգամավորը նկատեց, որ դրանում բարեփոխումներ ներկայացվող կետերը իրականում բարեփոխումներ չեն կարող լինել: «Չեմ կարծում, որ իշխանությունները կարողանան առաջ տանել այդ բարեփոխումները: Այս սխեման հակասում է Սահմանադրությանը: Իրատեսականությունը, խոհեմությունն ու շրջահայացությունը, հույս ունեմ, կգերակայեն, և իշխանությունները արժանի հետևություններ կանի: Այս «բարեփոխումների» վերաբերյալ ես բացասական եմ արտահայտվել դեռ 2010-ին: Պարզվում է՝ մենք ապաշնորհ ենք, չենք կարողանում ինքներս կառավարել մեր ֆինանսները և օտար ափերում առավել շնորհալի մարդկանց ենք փնտրում, ովքեր կգան և գործի կդնեն այս նոր համակարգը»,- ասաց Բոստանջյանը՝ հավելելով, որ իշխանությունների հանդեպ դեֆիցիտ կա:
Վարդան Բոստանջյանը քիչ հավանական համարեց, որ, նախնական հայտարարության համաձայն, կուտակային համակարգին անցում կատարելու դեպքում գործատուները աշխատողների կուտակումները կոմպենսացնեն: «Նման գեղջկական, ընկերական լուծումներ հնարավոր չեն: Հնարավոր չէ, որ մեկը, հուզված, փոխհատուցի մյուսի ծախսերը»,- ասաց նա:
Խոսելով ՀՀ երկրորդ նախագահ Ռոբերտ Քոչարյանի վերջին հարցազրույցների մասին՝ տնտեսագետը նկատեց, որ վերջինս դիպուկ, կոնկրետ նկարագրել է հանրապետությունում առկա մի շարք խնդիրներ: «Երբ գա պահը, նա կասի իր վերադարձի մասին, մինչ այդ չպետք է ենթադրություններ անել: Չէ՞ որ ամեն հարցազրույց տվող քաղաքական գործիչ չի ուզում իշխանության վերադառնալ»,- ասաց նա:
Լուսանկարը` PanARMENIAN Photo-ի
