ԱՄՆ նախագահ Բարաք Օբաման Մեծ Բրիտանիայի վարչապետ Դևիդ Քեմերոնին տեղեկացրել է էլեկտրոնային լրտեսման ծրագիրը վերանայելու գործընթացի մասին: ITAR-TASS-ի փոխանցմամբ՝ հինգշաբթի քաղաքական գործիչների միջև կայացած հեռախոսազրույցի մասին հաղորդել է Սպիտակ տունը:
Ինչպես ակնկալվում է, ուրբաթ Օբաման հատուկ ելույթով հանդես կգա՝ նվիրված Ազգային անվտանգության գործակալության ծրագրերի վերանայմանը:
Սպիտակ տան հաղորդագրության համաձայն՝ Օբաման և Քեմերոնը քննարկել են նաև Սիրիայի շուրջ ստեղծված իրավիճակը: Մասնավորապես, նրանք հաստատել են հակվածությունը՝ ուղղված «Ժնև-2» համաժողով անցկացնելու գաղափարին:
«Կողմերը քննարկել են սիրիական քիմիական զենքի ոչնչացման շարունակվող գործընթացը և ընդգծել են տվյալ գործընթացում միջազգային հանրության ներդրման կարևորությունը: Քննարկվել են նաև Սիրիայի և տարածաշրջանի համար աճող սպառնալիքները ծայրահեղական խմբավորումների կողմից»,- նշվում է հաղորդագրության մեջ:
