Մեքսիկայի դաշնային զորքերը գրավել են «Տամպլիերների օրդենի ասպետներ» թմրակարտելի պատվարը հանդիսացող Միչոական նահանգի Ապատսինգան քաղաքը: Այս մասին հայտնում է France-Presse գործակալությունը:
Զինվորականները զինաթափել են 200 ոստիկանի, որոնց մեղադրել են կարտելի անդամների հետ դավադրության համար: Իշխանությունները նշել են, որ ընդհանուր առմամբ հաջողվել է վերականգնել վերահսկողությունը Մեքսիկայի արևմուտքի 17 քաղաքների վրա, որոնցում նախկինում իշխել են թմրաբարոնները: Գործողության ընթացքում զոհերի և տուժածների մասին չի հաղորդվում:
Մինչ Ապատսինգան քաղաքի գրավումը մի քանի շաբաթ թմրակարտելի անդամներն ակտիվորեն պայքարել են նահանգի բնակիչների դեմ, ովքեր աշխարհազորային խմբեր են կազմել: Նրանց հաջողվել է տամպլիերներին դուրս մղել մի քանի քաղաքից:
