Գերագույն խորհրդի պատգամավոր Ազատ Արշակյանը կարծում է, որ Հայաստանի Հանրապետությունն անգամ իր հիմնադրման օրից փուչիկային կարգավիճակ է ունեցել: «Եթե խոսում ենք «փուչիկ»-ների մասին, պիտի ասենք, որ եղել են ղեկավարներ, որոնք փուչիկներ ստեղծելով զարգացրել, պահպանել են մեր պետությունը, այսինքն՝ պետք է գտնել մի փուչիկ, որով կպահպանվի Հայաստանը»,- ասաց նա:
Նրա խոսքով` արքաները միշտ անշնորհակալ են, իրենց վեզիրները, ներքինիները` նույնպես, և չպետք է սպասել, որ որևէ մեկն իր նախորդին կասի՝ շնորհակալ եմ: Այդպես է. պետք է ոչնչացնել նախորդին, որ երևաս, մանավանդ եթե երևալու բան չունես:
Արշակյանը նշեց, որ իշխանությունը փոխանցելու համար մի արտահայտություն կա՝ պոչը շուն է խաղացնում: Այդպես չէ. իրականում շունն է պոչ խաղացնում, այսինքն` կայսրը կհրամայի, այստեղ էլ կընտրեն: Ապագա իշխանությունը, ըստ Արշակյանի, Հայաստանում չի ձևավորվելու: «Ինչ-որ մարդիկ ասպարեզ են ուզում մտնել, առանց հասկանալու՝ իրենք իրենց գործն արել են, հանձնել են Հայաստանը: Երկրորդ նախագահն իր գործն արել է, սեպտեմբերի 3 է նախապատրաստել»,- ասաց նա:
«Ազգային անվտանգություն» կուսակցության նախագահ Գառնիկ Իսագուլյանի համար անհասկանալի մի բան կա. երկրորդ նախագահի օրոք էներգետիկայի նախարար աշխատած և հիմա նույն պաշտոնը կատարող մարդը քննադատում է իր` նախորդ շրջանում կատարած գործողությունները: «Գույք՝ պարտքի դիմաց»-ի ամենաակտիվ ու հիմնական դերակատարներից մեկը Արմեն Մովսիսյանն էր: «Ես առաջարկել էի հայտնի ֆիլմի նման՝ «3+2», որ ասում է` ա տեպեր յա նատաշա, թող հիմա մի թաշկինակ կապի, նստի մյուս սեղանի կողմը ու էն ժամանակվա Արմեն Մովսիսյանի փոխարեն պատասխանի իր գրածին: Եթե չի պատասխանում, ուրիշ պատասխանող չկա»,- ասաց նա` նաև հավելելով. շատերին թվում է, թե Իսագուլյանը, ամեն ինչ թողած, հանկարծ սկսում է պաշտպանել Ռոբերտ Քոչարյանին: Բանախոսը նշեց, որ իր խոսքի միակ նպատակը ոչ թե կոնկրետ անձի պաշտպանությունն է, այլ սկզբունքը:
Նա նաև նկատեց` չարաչար սխալվում են նաև այն մարդիկ, ովքեր կարծում են, թե ինքը վատ հարաբերություններ ունի Սերժ Սարգսյանի հետ:
