Տարին փակվեց, սակայն Հայաստանում ոչինչ չփոխվեց: Այսօր տեղի ունեցած մամուլի ասուլիսի ժամանակ այս մասին ասաց հասարակական-քաղաքական գործիչ Գուրգեն Եղիազարյանը՝ հավելելով, որ այսօր մարդիկ վառելիքի, սննդամթերքի լրջագույն խնդիրներ ունեն:
«Մարդիկ հեռանում են երկրից: Ինձ թվում է՝ Հայաստանում թուրքական ծրագիր է իրականացվում, քանի որ ոչինչ չի արվում կանխելու արտագաղթը:
Ահա այս ամենի ֆոնին ակտիվանում է ՀՀ երկրորդ նախագահը: Սակայն երկրի վիճակը նրան չի հետաքրքրում, նրան հետաքրքրում է այն, թե ինչ պետք է լինի Սերժ Սարգսյանից հետո: Ռոբերտ Քոչարյանը մտածում է միայն իր մասին: Ասեմ, սակայն, որ Սերժ Սարգսյանից հետո իր վիճակը լավ չի լինելու, և նա նա էլ լավ գիտի այս մասին:
Առաջին հայացքից, Ռոբերտ Քոչարյանի թիրախն օֆշորների մասնագետն է, որ ամեն ինչի մասնագետ է, բացի տնտեսությունից: Սակայն նրա իրական թիրախը Սերժ Սարգսյանն է: Տարեվերջին Քոչարյանը Սարգսյանին դեղին քարտ ցույց տվեց, ինչին կհետևի երկրորդ նախագահի՝ պարտադրանքով վարչապետ դառնալը»,- ասաց Գուրգեն Եղիազարյանը:
Քաղաքական գործչի խոսքով՝ հայ ազգը եզրագծի մոտ է, սպասելու համբերություն այլևս չունի: «Սակայն զարմանալիորեն ՚համբերատար ենք: Ղրղըզները մեր փոխարեն հիմա մի քանի անգամ տապալած կլինեին իշխանությանը: Սրանք որդնած են էն գլխից՝ նարկոդիլլերների բերած նախագահով, կղզում միլիոնատիրոջը «քցած» հերոսով: Եթե սխալ եմ, թող հերքում պահանջեն, դատի տան: Որ Սերժ Սարգսյանը կործանում է իմ երկիրը, ես դա կարող եմ ապացուցել»,- ասաց նա:
Ասուլիսի մյուս բանախոս, բանաստեղծ, հասարակական գործիչ Մերուժան Հովհաննիսյանն իր հերթին նկատեց, որ Հայաստանն աշխարհի միակ երկիրն է, որի իշխանությունները իր քաղաքացիներին ստիպում են հեռանալ երկրից: «Այս ազգն ափսոս է, նրան չպետք է մուրացիկ դարձնել: Այսօրվա իշխանությունում մեկ-երկու գրագետ նախարար կա, սակայն ողբերգությունն այն է, որ իշխանության մեջ շատ են վաշխառուական մտածողությամբ անձինք: Բայց գնալով՝ ավելի վատ իշխանություններ ենք ունենալու: Այժմ գործ ունենք ամենաստոր միավորի հետ: Հայաստանում Հանրապետական կուսակցություն գոյություն չունի: Մեռավ Անդրանիկ Մարգարյանը, նրա հետ հող իջավ նաև այդ կուսակցությունը: Իսկ Լևոն Տեր-Պետրոսյանի մասին գոնե կարող եմ ասել՝ նա ինտելեկտուալ նախագահ էր»՚,- ասաց նա:
Մերուժան Հովհաննիսյանը հոր գերեզմանով երդվեց, որ ինքն ու իր ընտանիքը այսօր ավելի վատ են սնվում, քան սովետական Վլադիմիրյան բանտում: «Իմ թոռը ծառայում է սահմանից մեկուկես կմ հեռավորության վրա, որտեղ ամեն կրակոցը կարող է բախտորոշ լինել: Ինձ ասում են՝ ինչու կապերդ չօգտագործեցիր՝ նրան թիկունք բերելու համար: Ես էլ պատասխանեցի՝ թոռս ծառայում է իր հայրենիքին. կենդ՚անի կմնա՝ հայրենիքի հոտաղ կլինի, կզոհվի՝ հայրենիքի մատաղ: Տարիներ առաջ Արա Սահակյանը, որը հիմա ՀՀ դեսպանն է Ղազախստանում, ինձ գործ խոստացավ, բայց այդպես էլ խոստումը չկատարեց: Հետո ես իմացա, որ նա գործով ապահովում է միայն սաունաներում իրեն անբարոյականներ մատակարարողներին»,- ասաց նա:
Լուսանկարը` PanARMENIAN Photo-ի
