Ty Inc. ընկերության սեփականատեր՝ ամերիկացի միլիարդատեր Թայ Ուորները Չիկագոյի դատարանի կողմից դատապարտվել է երկու տարվա պայմանական ազատազրկման՝ հարկերի վճարումից խուսափելու համար: Այս մասին հայտնում է ITAR-TASS-ը և նշում, որ նրա ընկերությունը փափուկ խաղալիքների՝ աշխարհում խոշորագույն արտադրողն է:
Քննության տվյալներով՝ 69-ամյա Ուորները չի վճարել շվեյցարական բանկերի հաշիվներում գտնվող 25 մլն դոլարի հարկը:
Ուորներին սպառնում էր 5 տարվա ազատազրկում, սակայն դատավորը որոշել է սահմանափակվել պայմանական ժամկետով: Բացի այդ, միլիարդատերը դատապարտվել է 500-ժամյա հասարակական աշխատանքի:
Forbes-ը նրա կարողությունը գնահատում է 2.6 միլիարդ դոլար: Նա մտնում է ԱՄՆ-ի 400 հարուստ մարդկանց ցուցակում:
