Ուժգին քամու և ձյան առատ տեղումների պատճառով Վերին Աջարիայի Խուլո վարչատարածքային միավորման 12 գյուղեր մնացել են առանց էլեկտրականության: Այս մասին հայտնում է Interfax-ը՝ հղում անելով Աջարիայի արտակարգ իրավիճակների հարցերով պատասխանատու Մամուկա Տուրմանիձեին:
Նրա խոսքով՝ սողանքներ են գրանցվել Խուլո և Կեդա գյուղերում՝ կաթվածահար անելով երթևեկությունը Բաթում-Ադիգեն ավտոմայրուղով:
«Չնայած եղանակային վատ պայմաններին՝ գրեթե ողջ օրը ճանապարհների մաքրման աշխատանքներ են իրականացվել, սակայն առատ տեղումներն ու ուժեղ բուքը մի շարք հատվածներում ճանապարհային բրիգադների ջանքերը զրոյացրել են»,- ասել է նա:
Մաչախելի կիրճում բքի հետևանքով անդունդում է հայտնվել «Նիվա» մակնիշի ավտոմեքենա, ինչի հետևանքով զոհվել է մեկ մարդ, ևս 2-ը հոսպիտալացվել են: Նրանց վիճակը ծանր է:
