«Բնականաբար, ճնշումները լինելու են բավական մեծ, և դրա վկայությունն են նախագահին ուղղված այն զանգերը, որ նախապես տարբեր կողմերից գալիս են»,- «Առաջին լրատվական»-ի հետ զրույցում ասաց ԱԺ ՀՅԴ խմբակցության պատգամավոր, ՀՅԴ գերագույն մարմնի ներկայացուցիչ Արմեն Ռուստամյանը՝ անդրադառնալով Կազանում այսօրվա եռակողմ հանդիպմանը:
Ռուստամյանը ասաց, որ չի կարծում, թե Կազանում ինչ-որ փաստաթուղթ կստորագրվի, որովհետև Ադրբեջանը իր կոշտ դիրքորոշումը չի փոխել. «Եթե համաձայնություն չի ձեռք բերվելու կարգավիճակի հետ կապված, ուրեմն հարցի որևէ լուծում, ըստ էության, չի կարող լինել, մանավանդ՝ վերջին օրերին Հայաստանը հայտարարել է, որ սկզբունքների հարցով էլ Ղարաբաղը պետք է համաձայնություն տա»:
ՀՅԴ-ական պատգամավորի խոսքերով՝ հայկական կողմի դիրքերը շատ հստակ պետք է լինեն մասնավորապես այն հարցում, որ եթե ԼՂ կարգավիճակի խնդիրը չի լուծվում, ապա որևէ փաստաթուղթ տարբեր սկզբունքների մատնանշմամբ չի կարող ընդունելի լինել. «Եթե այդպիսի վճռականությամբ գնանք, խնդիրը շատ ճիշտ ուղով կընթանա»:
Արմեն Ռուստամյանը նշեց, որ Ղարաբաղը դեմ է ներկայացված սկզբունքներին և պարտավոր է դեմ լինել, որովհետև Ղարաբաղում անցկացված երկու հանրաքվեների արդյունքները բոլորովին այլ բան են պահանջում Ղարաբաղի իշխանություններից և ողջ հայությունից:
