Իսպանիայում 422 մարդ է ձերբակալվել: Նրանք անցնում են շինծու աշխատանքային պայմանագրերի գործով: Այս մասին հաղորդվում է երկրի ՆԳՆ կայքում:
Ընդհանուր վնասը, որը խմբավորումը պատճառել է պետությանը, գնահատվում է առնվազն 2.6 մլն եվրո: Գործով անցնողներին ձերբակալելու գործողությունն իրականացվել է մոտ 30 քաղաքներում՝ փոխանցում է France-Presse գործակալությունը:
Հանցավոր խումբը կազմել է Իսպանիայի հարավի Խերես-դե-լա-Ֆրոնտերա քաղաքի բնակիչը: Իշխանությունները նրա անունը չեն հայտնում, սակայն հայտնի է, որ նա նույնպես ձերբակալվել է: Ոստիկանության տվյալներով՝ նա հանցակիցներ է ունեցել սոցիալական ծառայություններում:
Ավազակախմբի առաջնորդը կազմակերպել էր 10 կեղծ ընկերություններ, որոնք ղեկավարել են քրեական անցյալով թմրամոլները: Այդ ընկերությունները կեղծ աշխատանքային պայմանագրեր են վաճառել: Հաճախորդները պետք է սոցիալական ապահովագրավճարներ մուծեին, որոնք վերջնարդյունքում յուրացրել են խմբավորման առաջնորդները:
Զբաղվածության կեղծ փաստաթղթեր ունեցողները կարողացել են հավակնել սոցիալական արտոնությունների, էմիգրանտները՝ կեցության իրավունքի, բանտարկյալները՝ պահման ավելի մեղմ պայմաններով բանտ տեղափոխվելու:
Որոշ գնահատականներով՝ Իսպանիայում գործազուրկների թիվը հասնում է 26 տոկոսի: Նման ցուցանիշով երկիրը գտնվում է ԵՄ-ում երկրորդ տեղում՝ Հունաստանից հետո:
