Ռադայի ընդդիմադիր պատգամավորներն արգելափակել են երկրի խորհրդարանի աշխատանքը: Նրանք ձգտում են հասնել ներքին գործերի նախարար Վիտալի Զախարչենկոյի պաշտոնանկությանն ու ըստ կանոնակարգի, այլ ոչ թե կրճատված ընթացակարգով 2014 թվականի պետբյուջեի ընդունմանը: «Մենք պնդում ենք, որ բյուջեն անցնի բոլոր երեք քննարկումները Գերագույն ռադայում»,- ITAR-TASS-ին հայտնել է «Բատկիվշչինա» խմբակցության անդամ Սերգեյ Սոբոլևը: Նրա խոսքով՝ իրենք ձգտում են ընդմիջման, որպեսզի կրկին քննարկեն այդ հարցը խորհրդարանի ղեկավարության հետ:
Երեկ ուկրաինական ընդդիմությունը հայտարարել էր, որ պահանջում է ներքին գործերի նախարարի հրաժարականը՝ կապված բողոքի ակցիաների մասնակիցների հանդեպ ուժի կիրառման հետ:
«Իմաստ չունի նախարարին խորհրդարանում լսելը, նրան պետք է պաշտոնանկ անել: Մենք առաջարկում ենք նաև ստեղծել ժամանակավոր քննչական հանձնաժողով, որը կուսումնասիրի ցուցարարների դեմ ուժի անօրինական կիրառման փաստերը»,- ասել է ՈՒԴԱՌ ընդդիմադիր կուսակցության ղեկավար Վիտալի Կլիչկոն երկուշաբթի խորհրդարանի հաշտեցման խորհրդի նիստում: Նա ընդգծել է, որ հակառակ դեպքում ընդդիմությունը կարգելափակի Գերագույն ռադայի լիագումար նիստերը: «Խորհրդարանը չի աշխատի, եթե դուք մեզ չլսեք»,- հայտարարել է ՈՒԴԱՌ-ի առաջնորդը:
