Հանրապետական կուսակցության պատգամավոր, նախկին գլխավոր դատախազ Գևորգ Կոստանյանն անսպասելի հայտարարություն է արել Նիկոլ Փաշինյանին և ԱԺ արտահերթ ընտրության օրակարգն աջակցելու մասին՝ ասելով, որ Նիկոլ Փաշինյանի շուրջ կա կոնսոլիդացիա, և նա ազնիվ է իր մղումներում, հետևաբար պետք է մի կողմ դնել կուսակցական շահն ու մտածել պետության շահի մասին: Հայտարարությունն, անշուշտ, անսպասելի է։ Մյուս կողմից, սակայն, հոկտեմբերի 2-ը ցույց տվեց, որ իրավիճակը շատ լուրջ է, և կատակել հանրության հետ այդ իրավիճակում, մեղմ ասած վտանգավոր է: Այսօր ՀՀԿ խմբակցությունը լքելու մասին է հայտարարել նախկին ոստիկանապետ Ալիկ Սարգսյանը: Հիշարժան է, որ շաբաթներ առաջ նա ներգրավվել էր ապօրինի հարստացման մի գործով, որով անցնում է նաև նախկին վարչապետ Հովիկ Աբրահամյանը: Իրադարձությունները սկսել են զարգանալ նոր արագությամբ, սակայն դրանք թերևս ոչ թե խթանել են ՀՀԿ ներսում նոր պրոցեսներ, այլ նախկինում եղած խնդիրների պարզապես նոր, արագացված ընթացքով դրսևորում:
Ի՞նչ քայլերի է պատրաստ խորհրդարանը առաջիկա զարգացումների ֆոնին․ «Առաջին լրատվական»- ի հետ քննարկմանը մասնակցեցին Երևանի մամուլի ակումբի նախախագահ Բորիս Նավասարդյանը, վերլուծաբան Հակոբ Բադալյանը և ԱԺ «Ելք» խմբակցության պատգամավոր Հրաչ Հակոբյանը:
«Կամաց-կամաց շղթայական ռեակցիա է տեղի ունենում, այն մարդիկ, ովքեր օրեր առաջ դեմ էին արտահայտվում արտահերթ խորհրդարանական ընտրությունների դեկտեմբերին անցկացմանը, այսօր փոխում են իրենց կարծիքը, այսինքն՝ նրանց ողջախոհությունը սկսում է հաղթել»,- նշեց Բ. Նավասարդյանը՝ անդրադառնալով ՀՀԿ մի քանի պատգամավորների՝ մանդատը վայր դնելու մասին հայտարարություններին:
«Թե՛ ՀՀԿ-ին, թե՛ նրան միացած ՀՅԴ-ին և ԲՀԿ-ին տրվել է սահուն և հանդարտ քաղաքական ճանապարհով հեռանալու հնարավորություն: Իրավիճակի սխալ գնահատականը բերում է նրան, որ հանրության վերաբերմունքը ավելի է սրվում, և նրանք ավելի բարդ իրավիճակում են հայտնվում: Հոկտեմբերի 2-ը այն վերջին կետն էր, որից հետո եթե քաղաքական ուժերը չպատկերացնեն իրավիճակի լրջությունը, վատ հետևանքներ կարող են լինել»,- նշեց Հ. Բադալյանը՝ հավելելով, որ եթե ժողովրդի հաղթանակը չարձանագրվի, դա կբերի և՛ հանրային, և՛ պետական անոմալ գործընթացների:
«Պետք է հետ բերել այն 7 տոկոս ձայները, որոնք ԲՀԿ-ն կորցրեց. կարծում եմ, այդ ուղղությամբ է մտածում Գ. Ծառուկյանը»,- նշեց Բ. Նավասարդյանը՝ հավելելով, որ չի բացառում՝ բանակցությունների թեմա կդառնա նաև Ընտրական օրենսգիրքը:
Անդրադառնալով դիտարկմանը, որ ՀՀԿ-ի փափուկ նահանջը կարող է ծուղակ լինել, Հ. Բադալյանը նշեց, որ ցանկացած իրավիճակ ունի ռիսկեր և վտանգներ: Նրա դիտարկմամբ՝ նախկին համակարգը վախենում է վարչապետի հրաժարականից: Բադալյանի կարծիքով՝ ԱԺ կանոնակարգ օրենքում փոփոխություն անելու վերաբերյալ օրինագծի ընդունումը ցույց է տալիս նախկին համակարգի վախը. «Նրանք դա արեցին, որ վարչապետի հրաժարականի տարբերակով ԱԺ լուծարում չլինի»:
Մանրամասն՝ տեսանյութում:
