«Հայաստանում առողջ սեռական մտածելակերպ չկա»,- այսօր լրագրողների հետ հանդիպման ժամանակ նման գնահատական տվեց Սեքսոպաթոլոգիայի կլինիկայի սեքսոպաթոլոգ Վրեժ Շահրամանյանը՝ ցավով նշելով, որ դիմելիության նվազումը պայմանավորված է առողջ սեռական մտածելակերպի և տեղեկատվական միջոցառումների բացակայությամբ:
Սեքսոպաթոլոգը կարծում է, որ պետք է սկսել մշակել անհրաժեշտ միջոցառումների ծրագիր, որոնք կներառեն դպրոցներում դասընթացներ հակաբեղմնավորիչ միջոցների և պահպանակների մասին, քանի որ, Վ.Շահրամանյանի հավաստմամբ, դրանք նույնպես ունեն իրենց օգտագործման եղանակը, առանց որի՝ չեն կարող ունենալ ակնկալվող ազդեցությունը:
Մաշկաբանության և սեռավարակների գիտաբժշկական կենտրոնի փոխտնօրեն Գուրգեն Փորսուղյանը փաստեց, որ սեռավարակներով հիվանդների թիվը տարեցտարի ավելանում է, և այս տարվա տվյալների համաձայն՝ Հայաստանի Հանրապետությունում գրանցված է սեռավարակով հիվանդ 30-35 հազար մարդ։ Այս թիվը կազմում է հիվանդների միայն 30-40 տոկոսը, քանի որ ընդունված է համարել, որ հիվանդների մեծամասնությունը չի դիմում բժշկի: Խոսելով սեռավարակներով հիվանդների թիրախային խմբի մասին՝ Գ. Փորսուղյանը նշեց, որ հիվանդությունները տարածված են ակտիվ սեռական կյանքով ապրող՝ 16-40 տարեկան մարդկանց մոտ՝ հավելելով, որ նվազել է նաև առաջին սեռական հարաբերության տարիքը, որը տղաների դեպքում 15-ն է:
«Սեռական հիվանդությունները տարածված են այն շրջաններում, որտեղ մարդիկ չեն հետևում իրենց առողջությանը և չունեն ապրելակերպի համար նվազագույն պայմաններ, իսկ շատերը նախընտրում են դիմել իրենց ծանոթ բժիշկներին և զբաղվել ինքնաբուժությամբ, ինչի հետևանքով սեռական հիվանդություններն ամբողջությամբ չեն բուժվում և հանգեցնում են անպտղության թե կանանց, թե տղամարդկանց շրջանում»,- ասաց Գ. Փորսուղյանը՝ ընդգծելով, որ ցանկացած սեռավարակ ժամանակին չբուժվելու դեպքում հանգեցնում է անպտղության:
Հիշեցնենք, որ սեռական հիվանդությունները բաժանվում են երկու խմբի՝ վերքով արտահայտվող և լորձաթարախային արտազատումով: Առաջին խմբին պատկանող հիվանդություններից է սիֆիլիսը, իսկ մյուս խմբի մեջ են մտնում սեռական օրգանների հերպեսը, գոնորեան, գորտնուկները, որոնցից յուրաքանչյուրն ունի յուրահատուկ կլինիկական պատկեր:
Գ.Փորսուղյանը նշում է, որ հանրապետությունում կան տարածված կոնկրետ սեռավարակներ, որոնցից են սիֆիլիսը, գոնորեան, գորտնուկները, սեռական օրգանների հերպեսը, ՄԻԱՎ-ՁԻԱՀԸ: Ուստի մասնագետները խորհուրդ տվեցին առաջին իսկ ախտանշանի դեպքում բժշկի դիմել զուգընկերոջ հետ միասին:
