Օրերս tert.am լրատվական կայքն անդրադարձել էր «Եռաբլուր» զինվորական պանթեոնին՝ նշելով, որ ձյան հաստ շերտի տակ են մնացել հերոսների շիրմաքարերը, ընդհանուր առմամբ մաքրված են միայն գլխավոր ճանապարհները:
«Առաջին լրատվական»-ը եղավ «Եռաբլուրում», նկարահանեց տարածքն ու զրուցեց «Եռաբլուր» պանթեոնի տնօրեն, գնդապետ Սուրեն Խաչատրյանի հետ: Մեզ հետ զրույցում նա ասաց, որ ամբողջ՝ 29 հա տարածքը մաքրվում է պանթեոնի անձնակազմի կողմից, հնարավոր չէ 740 շիրիմ մաքրել մեկ օրվա ընթացքում, որպեսզի եկած ձյունը քարի վրա չսառի. «Ցրտաշունչ ձմեռ էր, գիշերն անցնում է, եկած ձյունը սառում է, մենք թույլ չենք տալիս, որ որևէ մեկը մաքրի շիրիմը, քանի որ սառույցը մաքրելու դեպքում փչանում է շիրմաքարը, դա մեկ օրվա համար չէ, մեր հերոսների հուշարձաններն են, դրա համար գերադասում ենք՝ մնան այդ վիճակում, քան փչացնենք»:
Բացի այդ, նա նշեց, որ իրենց իրավասության տակ չի մտնում կոնկրետ շիրմաքարերը մաքրելը, սակայն իրենք աշխատում են իրենց կարողացածի ահմաններում մաքրել, պահպանել քարերը, որևէ չորացած ծաղիկ կամ ճյուղ չթողնել. «Այստեղ հիմնականում իմ մարտական ընկերներն են, որոնց հետ շփվել եմ, բոլորին ճանաչում եմ, եթե ինչ-որ մեկն ինձանից ավելի ցավ կզգա, ավելի ցավով կվերաբերվի այս սրբավայրին, խնդրեմ»:
Գնդապետը մեզ տեղեկացրեց նաև, որ Եռաբլուրում աշխատողների մեջ են զոհված ազատամարտիկների ծնողները, և եթե նրանք չեն մաքրում քարերի ձյունը, ուրեմն գիտեն՝ ինչի համար: Բացի այդ, ամեն շաբաթ-կիրակի օրերին ՊՆ-ն ավտոբուսներ է տրամադրում ազատամարտիկների հարազատներին՝ «Եռաբլուր» այցելելու համար:
Մեր զրուցակիցը, ով «Արծիվ մահապարտներ» գումարտակում է կռվել, վերջում հավելեց, որ «Եռաբլուրը» միշտ բաց է նրանց առաջ, ովքեր կուզեն ծառատունկ կատարել, որևէ միջոցառում իրականացնել կամ գալ և մաքրել տարածքը: Ինչ վերաբերում է այցելություններին, ապա միայն անցյալ տարի «Եռաբլուրի» հուշամատյանում գրանցված է շուրջ 53 հազար այցելու, այդ թվում՝ տարբեր երկրների հայ համայնքներից:
Մանրամասները դիտեք մեր տեսանյութում:
