2011 թ. հունիսի 15-ին Ս.Ոսկանյանի իրավահաջորդի ներկայացուցիչ Է.Մարուքյանը դիմել է ՀՀ հատուկ քննչական ծառայություն՝ խնդրելով Ս.Ոսկանյանի գործը քննող համապատասխան քննիչին քննարկել «Հետք» էլեկտրոնային էջում տպագրված հոդվածում նշված պաշտոնատար անձանց առնչությունն ու մեղավորությունը Ս.Ոսկանյանին ստացիոնար պատշաճ բժշկական օգնություն չցուցաբերելու և քաղաքացիական հիվանդանոց կամ «Դատապարտյալների կենտրոնական հիվանդանոց» ՔԿՀ չտեղափոխելու վերաբերյալ հարցերը, որի հետևանքով մահացել է Ս.Ոսկանյանը: Այդ մասին տեղեկացնում է Հելսինկյան քաղաքացիական ասամբլեայի Վանաձորի գրասենյակը:
2011 թ. հունիսի 13-ին «Հետք» էլեկտրոնային էջում տպագրվել է «Կալանավորի մահը բժշկի՞ վրա են բարդում» վերնագրով հոդվածը, որում «Վանաձոր» ՔԿՀ-ի բժիշկ, սույն քրեական գործով մեղադրյալ Մ.Մինասյանը պնդել է, որ ինքը Ս.Ոսկանյանի առողջական ծանր վիճակի մասին տեղեկացրել է ՔԿՀ վարչության առողջապահական բաժնին, սակայն նրանք ոչինչ չեն ձեռնարկել հիվանդին ստացիոնար պատշաճ բժշկական օգնություն ցուցաբերելու նպատակով քաղաքացիական հիվանդանոց կամ «Դատապարտյալների կենտրոնական հիվանդանոց» ՔԿՀ տեղափոխելու համար, որի հետևանքով մահացել է տուժող Ս.Ոսկանյանը: Ավելին՝ հոդվածում խոսք է գնում նաև Լոռու մարզի դատախազի առնչության մասին, ըստ որի՝ նա թույլ չի տվել, որ հիվանդին ստացիոնար պատշաճ բժշկական օգնություն ցուցաբերելու նպատակով քաղաքացիական հիվանդանոց կամ «Դատապարտյալների կենտրոնական հիվանդանոց» ՔԿՀ տեղափոխեն: Հիշեցնենք, որ Ս.Ոսկանյանին մեղադրանք էր առաջադրվել Սվետլանա Կազազյանի (ոստիկանության փոխգնդապետի մոր.- Է.Մ.) սպանության և Աստղիկ Աղաբեկյանի նկատմամբ ավազակային հարձակում կատարելու համար: 2010 թ. հոկտեմբերի 10-ին նա տեղափոխվել էր «Վանաձոր» քրեակատարողական հիմնարկ, իսկ հոկտեմբերի 24-ին մահացել կալանավայրում՝ ինքն իրեն թուք ներարկելու և ոտքի գանգրենայի պատճառով:
2010 թ. դեկտեմբերի 30-ին ՀՀ ոստիկանության Լոռու մարզի քննչական բաժնում հարուցվել է քրեական գործ՝ «Վանաձոր» ՔԿՀ-ի բժիշկ Մ.Մինասյանի կողմից իր մասնագիտական պարտականությունները ոչ պատշաճ կատարելու հետևանքով բուժվող հիվանդ Ս.Ոսկանյանի մահվան դեպքի առթիվ:
