ՀՀ պետական եկամուտների կոմիտեի ավտոտրանսպորտային միջոցների մաքսային ձեւակերպումների մասնագիտացված մաքսատան «Նորագավիթ» մասնաճյուղի գլխավոր մուտքը այսօր մոտ 3 ժամ փակ էր։ Մի խումբ վարորդներ այս ձևով իրենց բաղոքն էին արտահայտում մաքսատան մոտ ամեն օր գոյացող հսկայական հերթերից և մաքսատան աշխատակիցների կամայական վերաբերմունքից, որի հետևանքով մեքենաների մաքսազերծման գները կախված են լինում աշխատակիցների բարեհաճությունից։ Հաջորդ կարևոր բողոքը այն էր, որ էլեկտրոմոբիլների համար բնապահպանական հարկ է գանձվում։
Բողոքի ակցիայի մասնակիցներին դիմավորել է մաքսատան «Նորագավիթ» մասնաճյուղի պետ՝ Մաքսայինի պետի տեղակալ Արմեն Սաֆարյանը, ով հավաստիացրել է, որ բոլոր խնդիրների մասին տեղյակ են և դրանք մեկ առ մեկ լուծվելու են։
Մաքսազերծման հերթի մեջ սպասող քաղաքացիները «Առաջին լրատվական»-ի հետ զրույցում փաստել են, որ որոշ դեպքերում կեսգիշերից են գալիս, որպեսզի կարողանան հաջորդ օրը մինչև երեկո մաքսազերծեն իրենց մեքենան։