«Ազատամարտիկների դաշինքը» շարունակում է պնդել, որ ԵԿՄ-ն պետք է ունենա կոլեգիալ կառավարում։ «Առաջին լրատվական»-ի հետ զրույցում դաշինքի խորհրդի անդամ Գագիկ Մելքոնյանն ընդգծեց՝ իրենք անձերին դեմ չեն. «Սկզբում բոլորը համաձայն էին այդ տարբերակին, այնուհետև կուլիսների հետևում պայմանավորվեցին Արամ Սարգսյանի հետ, նա էլ տվեց իր համաձայնությունը, որ դառնա ԵԿՄ նախագահ»։
Մեր զրուցակիցն ընդգծում է. «Այժմյան իրավիճակը մտահոգիչ է, մենք կոչ ենք անում միավորվել ու ամբիցիաները դնել մի կողմ։ Մեր երկրում իրավիճակն այնպիսին է, որ ամեն մարդ իրեն տեսնում է նախագահ, ցանկանում է ինքը լինել կամ եթե ոչ ինքը, ապա ընկերը։ Մենք հիմա մտածում ենք, որ երկրապահը պետք է լինի համախմբված»։
Գագիկ Մելքոնյանը առաջարկում է, որ երեք թեկնածուները՝ Արամ Սարգսյանը, Սասուն Միքայելյանը, Արայիկ Խուդավերդյանը, նստեն մի սեղանի շուրջ ու քննարկեն իրավիճակը. «Մենք կոչ ենք անում, որ երեքով ու բոլոր նրանք, ովքեր ուզում են ԵԿՄ նախագահ դառնալ, նստեն ու զրուցեն , եթե ուզում են, թող բոլորն էլ դառնան համակարգող խորհրդի անդամ»։
Հարցազրույցն ամբողջությամբ՝ տեսանյութում:
