Ճիշտ կլիներ, եթե Մարդու իրավունքների եվրոպական դատարանում Հայաստանի կառավարության լիազոր ներկայացուցչի պաշտոնը զբաղեցնող ՀՀ գլխավոր դատախազ Գևորգ Կոստանյանին մեկ այլ անձ փոխարիներ: «Առաջին լրատվական»-ի հետ զրույցում այս մասին ասաց Միջազգային իրավունքի մասնագետ Արա Ղազարյանը՝ հավելելով, որ հարմար թեկնածուներ շատ կան:
«Մի առիթով Գևորգ Կոստանյանն ասաց. «Ես կարող էի ԺԵԿ-ի պետ լինել և ՄԻԵԴ-ում ներկայացնեի Հայաստանի Հանրապետությունը»: Բայց կարծում եմ, որ որոշ գործերով նա կարող է շահերի բախում ունենալ. ասենք, եթե Եվրոպական դատարանը քննի զինվորական գործեր, հնարավոր է՝ շահերի բախում տեղի ունենա: Միաժամանակ, էականը ոչ այնքան շահերի բախումն է, որքան նրա՝ համատեղության կարգով աշխատելը ՄԻԵԴ-ում բացասական լույսի ներքո դիտվելը: Ես չեմ կարող ասել՝ ինչու է Գևորգ Կոստանյանը շարունակում Հայաստանի ներկայացուցիչը մնալ այդ կառույցում՝ հաշվի առնելով նրա խիստ ծանրաբեռնվածությունը: Դժվարանում եմ պատկերացնել՝ ինչպես է նա հասցնում համատեղել երկու աշխատանքները»,- նկատեց Արա Ղազարյանը:
Ամփոփելով՝ միջազգային իրավունքի մասնագետը նկատեց, որինքը Գևորգ Կոստանյանի հետ գրավոր կոմունիկացիաներով առնչվել է 10 տարի: «Շատ լավ գիտեմ նրա գրելու ոճը: Գլխավոր դատախազ դառնալուց հետո նկատում եմ, որ նա ավելի համառոտ է գրում: Դա, գուցե, ծանրաբեռնվածության հետևա՞նք է»,- հարց հնչեցրեց Արա Ղազարյանը:
Փաստաբան Հայկ Ալումյանն էլ «Առաջին լրատվական»-ի հետ զրույցում նշեց, որ եթե Գևորգ Կոստանյանի ժամանակը հերիքում է, ապա ինքը երկու պաշտոնների համատեղման մեջ արտառոց ոչինչ չի տեսնում: «Շատ երկրներ ՄԻԵԴ-ում ներկայացված են փաստաբանների միջոցով: Այդուհանդերձ, սկզբունքային տարբերություն չկա՝ ով կներկայացնի պետությունը Եվրոպական դատարանում»,- ասաց Հայկ Ալումյանը:
Հարցին՝ որքանով արդյունավետ է գնահատում ՀՀ գլխավոր դատախազի գործունեությունը ՄԻԵԴ-ում, փաստաբանը պատասխանեց. «Ես մի սկզբունք ունեմ. բոլոր պրակտիկանտներին սովորոցնում եմ դատավարական հակառակորդին՝ ով էլ լինի, մասնագիտական ինչ որակներ էլ ունենա, գովել: Հիմա էլ ուզում եմ գովեստով խոսել Գևորգ Կոստանյանի մասին»:
Հիշեցնենք, որ ՀՀ գլխավոր դատախազ Գևորգ Կոստանյանը 2004 թվականիցՄԻԵԴ-ումՀայաստանի կառավարության լիազոր ներկայացուցիչն է:
