Բաթումում ընթացող շախմատի համաշխարհային օլիմպիադայի 5-րդ տուրում Հայաստանի տղամարդկանց հավաքականն առաջին պարտությունը կրեց: Մերոնք 2․5-1․5 զիջեցին Ադրբեջանին, որը դարձավ մրցաշարի առաջատարներից մեկը: Մասնավորապես, 5-րդ տուրից հետո աղյուսակը 10-ական միավորով գլխավորում են Չեխիայի, Ադրբեջանի, Լեհաստանի և Ուկրաինայի թիմերը:
Հայաստանի հավաքականը 8 թիմային միավորով կիսում է 8-24-րդ հորիզոնականները: Մինչ այս մեր հավաքականը 4 անընդամեջ հաղթանակ էր տարել առավելության հասնելով Ճապոնիայի, Ղազախստանի, Թուրքիայի և Հունաստանի հավաքականների նկատմամբ: Ադրբեջանի հետ մրցավեճում մասնագետները մեր հավաքականի թույլ օղակներն էին համարում 3-րդ և 4-րդ խաղատախտակները: 3-րդ խաղատախտակի վրա Հրանտ Մելքումյանը սպիտակներով մրցեց Արկադի Նայդիչի, իսկ 4-րդ խաղատախտակի վրա Հայկ Մարտիրոսյանը՝ սևերով Ռաուֆ Մամեդովի հետ: Մելքումյանը և Մարտիրոսյանը անհատական գործակիցներով զգալի զիջում էին մրցակիցներին և հատկապես ադրբեջանցի մեկնաբանները կարծում էին, որ Նայդիչը և Մամեդովը ամենայն հավանականությամբ 1․5 միավոր կբերեն իրենց հավաքականին: Առաջին խաղատախտակի վրա Լևոն Արոնյանը սպիտակներով խաղաց ադրբեջանական շախմատի առաջատար Շահրիար Մամեդյարովի հետ, իսկ երկրորդ խաղատախտակի վրա Գաբրիել Սարգսյանը սևերով ուժերը չափեց ադրբեջանցի մեկ այլ հայտնի գրոսմայստեր Թեմուր Ռաջաբովի հետ:
Ու թերև անհատական վարկանիշով Արոնյանն ու Սարգսյանը զիջում էին ադրբեջանցի մրցակիցներին այնուամենայնիվ հույս ունեինք, որ հատկապես փորձի հաշվին մեր շախմատիստները գոնե չեն պարտվի: Հայաստան-Ադրբեջան խաղում տեղի ունեցած զարգացումները ավելի քան անսպասելի էին: Արոնյանը անցկացնելով անվստահ պարտիա արդեն 48-րդ քայլում հանձնվեց: Թույլ պարտիա անցկացրեց նաև Սարգսյանը պարտություն կրելով 43-րդ քայլում: Ինչ վերաբերվում է Մելքումյանին, ապա այս շախմատիստը հերթական փայլում պարտիան անցկացրեց առավելության հասնելով բավական ուժեղ մրցակցի նկատմամբ: Պետք է արժանին մատուցել նաև Մարտիրոսյանին, որը պայքարեց մինչև վերջ և սև ֆիգուրներով կես միավոր վաստակեց: Հայաստան-Ադրբեջան հանդիպման շուրջ բնականաբար լարվածությունը մեծ էր: Բնական է, որ մեր շախմատիստներից յուրաքանչյուրը այս մրցավեճում պատասխանատվության անհամեմատ ավելի մեծ զգացում է ունեցել:
Լարվածությունը կարելի է համարել մեր հավաքականի պարտության հիմնական պատճառը: Առաջին դեպքը չէ, երբ լարված պարտիաներում Արոնյանի նյարդերը տեղի են տալիս: Դրա վառ ապացույցը այս տարվա մարտին տեղի ունեցած աշխարհի չեմպիոնի հավակնորդների մրցաշարն էր, որտեղ մեր առաջատար շախմատիստը չդիմանալով լարվածությանը ձախողվեց: Փաստորեն, Ադրբեջանի հետ հանդիպումը ցույց տվեց, որ մեր հավաքականի երիտասարդ «թևը» ավելի ամուր է և հոգեբանական առումով դիմացկուն քան առաջատարները: Բնական է, որ Հայաստանի նկատմամբ տարած հաղթանակը հարևան երկրում մեծ ցնծություն է առաջացրել: Այս պահին մեր հավաքականն առաջատարներին զիջում է 2 միավորով: Մրցաշարի ավարտին դեռ կա 6 տուր ինչը նշանակում է, որ մեր հավաքականն իրական հնարավորություն ունի չեմպիոնի կոչման համար պայքարելու: Ընդունենք, որ նման մրցաշարերում գլխավորը վերջնական արդյունքն է, ոչ թե առանձին վերցված սկզբունքային հանդիպումները:
Ինչևէ, ընթացիկ համաշխարհային օլիմպիադայում գերազանց է ելույթ ունենում Հայաստանի կանանց հավաքականը, որը ևս իրական հնարավորություն ունի չեմպիոնի կոչումը նվաճելու: 5-րդ տուրում մեր կանանց հավաքականի մրցակիցն էր գործող չեմպիոն Չինաստանի ընտրանին, որը գլխավորում է կանանց աշխարհի չեմպիոն Ցզյու Վենցզյունը: Մրցախաղն ընթացավ լարված պայքարում և ավարտվեց ոչ-ոքի հաշվով: Առաջին խաղատախտակի վրա Էլինա Դանիելյանը ոչ-ոքի խաղաց աշխարհի կանանց չեմպիոնի հետ, երկրորդ խաղատախտակի վրա հանդես եկող Լիլիթ Մկրտչյանը հաղթեց Շեն Յանին, Աննա Սարգսյանը ոչ-ոքի խաղաց Հուան Ցիանի հետ, իսկ Մարիա Կուրսովան, ցավոք, պարտություն կրեց: Կանանց պայքարում 5-րդ տուրից հետո ԱՄՆ կանանց հավաքականը 10 միավորով սկսեց միանձնյա գլխավորել աղյուսակը: 6 հավաքական՝ Հայաստանը, Չինաստանը, Ուկրաինան, Հնդկաստանը և Վրաստանի առաջին և երկրորդ թիմերը 9-ական միավորով կիսում են 2-7-րդ հորիզոնականները:
Այսօր մրցաշարում հանգստյան օր է, իսկ սեպտեմբերի 30-ին կայանալիք 6-րդ տուրում մեր մրցակիցն է լինելու մրցաշարում ամենաբարձր միջին գործակից ունեցող Ռուսաստանի թիմը: Տղամարդկանց հավաքականն էլ մրցելու է Մակեդոնիայի հավաքականի հետ:
