Ռուսաստանի նախագահ Դմիտրի Մեդվեդևը չի բացառել, որ կարող է քաղաքական կուսակցության գլուխ կանգնել: Երեկ նա այս մասին ասել է՝ հանդիպելով լրագրողների հետ: Մեդվեդևին հարց են ուղղել այժմ օլիգարխ Միխայիլ Պրոխորովի գլխավորած «Արդար գործ» կուսակցությունը ղեկավարելու վերաբերյալ:
Մեդվեդևը խուսափել է հարցին ուղիղ պատասխան տալուց. «Ես կարծում եմ, որ նախագահը կարող է գլխավորել ցանկացած կուսակցություն՝ հենց միայն ելնելով ձեռք բերված փորձից, քանի որ նախագահը մեծ գործընթացներ ղեկավարող հմուտ քաղաքական գործիչ է: Իսկ թե ձգտո՞ւմ եմ արդյոք ես դրան, ասեմ՝ չեմ բացառում, նույնիսկ կարծում եմ, որ, ուշ թե շուտ, դա տեղի կունենա: Թե որ կուսակցությունը դա կլինի՝ թույլ տվեք չպատասխանել»,- ասել է Մեդվեդևը:
Միաժամանակ նա չի բացառել, որ դա կարող է լինել ինչպես գործող, այնպես էլ նորաստեղծ կուսակցություն:
