«Edison Research» միջազգային կազմակերպությունը «Ռուսթավի 2»-ի պատվերով մասշտաբային սոցիոլոգիական հետազոտություն է իրականացրել, որի արդյունքներից հետևում է, որ Վրաստանի նախագահ ընտրելու համար կարող է երկրորդ փուլ պահանջվել: Այդ մասին գրում է Gruzia Online-ը։
Հարցումներն անց են կացվել սեպտեմբերի 14-23-ը, դրանց մասնակցել է 3.000 մարդ: Ուսումնասիրության համաձայն՝ «Ուժը միասնության մեջ է» միավորված ընդդիմության թեկնածու Գրիգոլ Վաշաձեի օգտին պատրաստ է քվեարկել 22%-ը:
«Եվրոպական Վրաստան»-ից նախագահի թեկնածու Դավիթ Բաքրաձեի օգտին պատրաստ է քվեարկել 18%-ը, անկախ թեկնածու, նախկին ԱԳ նախարար Սալոմե Զուրաբիշվիլիի օգտին, ում աջակցում է «Վրացական երազանք»-ը, պատրաստ է քվեարկել հարցման մասնակիցների 15%-ը:
«Լեյբորիստական կուսակցության» նախագահի թեկնածու Շալվա Նաթելաշվիլիի օգտին պատրաստ է քվեարկել հարցման մասնակիցների 8%-ը, «Շարժում հանուն կառուցապատման» նախագահի թեկնածուի օգտին՝ 3%-ը, իսկ «Գիրչի» կուսակցությունից նախագահի թեկնածու Զուրաբ Ջափարիձեի օգտին՝ 2%-ը:
