Այսօր սկանդալային գաղտնալսման հետ կապված հայտարարություն են տարածել Ռոբերտ Քոչարյանի պաշտպանները, որոնք գտնում են, որ իրենց պաշտպանյալի նկատմամբ իրականացվում է ոչ օրինական քրեական հետապնդում: Հարկ է նկատել, որ պաշտպանական կողմի մարտավարության սպասելի կոշտացումը պայմանավորված է ոչ միայն այդ փաստով, այլ նաև այն հանգամանքով, որ Մարտի 1-ի բացահայտումը մոտեցել է կրիտիկական կետի: Առաջիկա շաբաթներին սպասվում են մի քանի կարևոր իրադարձություններ, որոնցից առանցքայինն անշուշտ, սեպտեմբերի 20-ին սպասվող Մարտի 1-ի գործով առաջին վճիռն է ՄԻԵԴ դատարանում: Ակնհայտ է, որ ՄԻԵԴ-ի վճիռը նախադեպային է լինելու, ըստ էության, գնահատական է տալու Հայաստանի արդարադատությանը՝ Ռոբերտ Քոչայնանի և Սերժ Սարգսյանի նախագահության շրջանում: ՄԻԵԴ-ի վճռից հետո առաջանալու է կոնկրետ պաշտոնյաների, քննիչների, դատավորների, առաջին հերթին գլխավոր դատախազ Աղվան Հովսեփյանի իրավական պատասխանատվության հարցը, և այս առումով կանխատեսելի է,որ Մարտի 1-ի գործը կունենան նոր դրվագներ:
«Առաջին լրատվական»- ի հետ թեմայի շուրջ քննարկմանը մասնակցեցին ԳԽ պատգամավոր Ազատ Արշակյանը, պատմաբան Վահրամ Թոքմաջյանը և իրավապաշտպան Զարուհի Հովհաննիսյանը:
«Գաղտնալսումների տեխնիկային տիրապետում են Հայաստանի բոլոր հակառակորդները, հայկական պետությունը վտանգված է: Երբ ես պատգամավոր էի, հստակ ցուցումներ կային, թե ինչի մասին կարելի է խոսել հեռախոսով, ինչի մասին՝ չի կարելի, այդ ցուցումները հիմա էլ պետք է պահել: Հարկավոր է շատ զգուշ լինել,- նշեց Ա. Ազատյանը: -Ես ուզում եմ, որ այս տարիների ընթացքում տեղի ունեցած անարդարությունների մեղավորները պատասխանատվության ենթարկվեն՝ երկու թիրախներ կան՝ երկրորդ և երրորդ նախագահները»:
«Հեռախոսն ամեն տեսակի զևզեկությունների համար չէ… Այս դեպքում, իհարկե, զևզեկություն չէր, կարևոր հարց էր քննարկվում, և այդ ձայնագրության հրապարակումը լուրջ հարված էր ՀՀ-ին,- նշեց Վ. Թոքմաջյանը: -Ինչ վերաբերում է Քոչարյանի պաշտպանների մոտեցումներին, այս առիթն օգտագործեցին լավագույն պաշտպանությունը հարձակումն է սկզբունքով: Քոչարյանն իր պաշտպաններին անընդհատ վատ դրության մեջ է դնում՝ շատ խոսելով, ինքնախոստովանական ցուցմունքներ տալով»:
Զ. Հովհաննիսյանի խոսքով՝ փաստաբանների ասուլիսը նախապատրաստված հարձակողական էր: «Քոչարյանն իր հարցազրույցներով տալիս է հավելյալ ցուցմունքներ ինքն իր դեմ, որոնք օգտագործվելու են»,- նշեց իրավապաշտպանը:
«Քոչարյանը վատություն է արել Հայաստանին, որպես նախագահ, հիմա նա որպես հալածյալ նույնպես վատություն է անում՝ ասելով՝ կդիմեմ Բրյուսելին, Մոսկվային: Քոչարյանը շանտաժի է ենթարկում Հայաստանին: Այս ամբողջ պրոցեսը՝ գաղտնալսումը, Քոչարյանի հայտարարությունները շանտաժի տարրեր ունեն»:
Մանրամասները՝ տեսանյութում:
