Եվրոպան Հայաստանին պետք է օգնի փրկել իր անկախությունը: «Առաջին լրատվական»-ի հետ զրույցում այս մասին ասաց Ֆրանսիայի Ռազմավարական հետազոտությունների հիմնադրամի փորձագետ, քաղաքագետ Կայծ Մինասյանը՝ խոսելով 2014 թ. Հայաստանի արտաքին քաղաքական առաջնահերթությունների մասին:
Նա նշեց, որ Հայաստանի համար մշտապես կարևոր է եղել խաղաղությունը, և դա կարևորություն է մնալու 2014 թ. համար ևս, ուստի ԼՂ հակամարտության խաղաղ կարգավորման բանակցությունները պետք է շարունակվեն՝ հաշվի առնելով այն, որ նախորդ տարի նախագահների հանդիպումից հետո հակամարտության խաղաղ կարգավորման գործընթացում բանակցային նոր փուլ է սկսվել: Այս տարի, ըստ նրա, կարևոր մի շարք հարցեր պետք է արժանանան գերտերությունների արձագանքին: Կայծ Մինասյանի խոսքով՝ Պարսկաստանի հարցն է շատ կարևոր:
«Եթե Իրանի հարցը լուծվի Իրանի և միջազգային համայնքի միջև, եթե Իրանը վերադառնա միջազգային ասպարեզ, նշանակում է, որ Հայաստանը կկարողանա իր դերակատարությունն ունենալ և հետաքրքրություններ առաջ քաշել: Հայաստանը կապված է Ռուսաստանին, բայց Հայաստանը պետք է պաշտպանի իր անկախությունը: Հարց է՝ արդյո՞ք Հայաստանն այսօր անկախ է, թե ոչ: Դա կարևոր հարց է: Շատ կարևոր է դա, իբրև արտաքին քաղաքականություն, առաջ մղել, բայց ըստ իս՝ պետք է մեր դիվանագիտությունն ավելի ակտիվ լինի, ավելի մոտ պետք է լինի ժողովրդին, հասարակությանը և մինչ այսօր որևէ արդյունք չի տվել այդ դիվանագիտությունը»,- նշեց նա:
Անդրադառնալով ԱՄՆ պետքարտուղար Ջոն Քերիի և Ֆրանսիայի նախագահ Ֆրանսուա Օլանդի՝ Հայաստան կատարելիք այցերին՝ Կ. Մինասյանն ասաց, որ պետք է սպասել և տեսնել, թե ինչ կհայտարարեն նրանք Հայաստանում: «Շատ բան չեմ սպասում այդ այցերից»,- նշեց նա: Մեր զրուցակցի կարծիքով՝ քանի որ Հայաստանը փորձում է միանալ ՄՄ-ին, Արևմուտքը պետք է ավելի կարևորություն տա Հայաստանին, որպեսզի վերջինս փրկի իր անկախությունը:
«ՀՀ անվտանգության համար գիտենք, որ ՌԴ-ն է կարևոր, բայց ըստ իս՝ պետք է ոչ միայն դիվանագետները, այլ ամբողջ սփյուռքը կարևորություն տա, որ այլ ուժեր ևս կարող են Հայաստանի անվտանգությունը երաշխավորել: Բայց մյուս կողմից՝ Պարսկաստանը, Թուրքիան, ԱՄՆ-ը, ՌԴ-ն տարածաշրջանը, այդ թվում՝ Հայաստանը, դիտարկում են, որպես ռազմաքաղաքական գործոն, բայց Եվրոպան չունի այդ մոտեցումը: Եվրոպան կարևորություն չի տալիս Հայաստանին: Կարծում եմ, որ 2014 թ. այն տարին է, որ Արևմուտքը պետք է փրկի ՀՀ անկախությունը կամ այդ տարածաշրջանն ավելի պետք է ռուսացվի՝ Վրաստանից, Ադրբեջանից մինչև Հայաստան: Չմոռանանք, որ ՌԴ-ն երկու խնդիր ունի՝ ներքին և արտաքին: Արտաքինը Աֆղանստանի խնդիրն է՝ եթե այս տարի կամ մյուս տարի ՆԱՏՕ-ն դուրս գա Աֆղանստանից, ռուսներն առաջին գծի վրա են լինելու: Երկրորդ հարցը՝ Սոչիի և տեռորիզմի հարցը Չեչնիայում: ՌԴ-ի համար կարևոր է անվտանգության հարցը, և Սոչիից առաջ բարդ գործընթացներ եմ սպասում: Անվտանգության հարցը ստիպում է Մոսկվային ավելի հաստատվել և ուժեղանալ Հարավային Կովկասում և Կենտրոնական Ասիայում, որը Եվրոպան չի կարևորում»,- նշեց նա:
