«Ելնելով տարբեր երկրների միջազգային փորձից՝ կոռուպցիայի դեմ պայքարը հնարավոր է իրականացնել արդյունավետ կերպով կենտրոնացված կարգով և երեք հիմնական հենասյուների վրա, դրանք են՝ հակակոռուպցիոն կրթություն, կանխարգելում և պատժի անխուսափելիությունը: Եթե կենտրոնանում ենք միայն պատժի անխուսափելության վրա և բաց ենք թողնում մյուս երկու գործառույթները, ապա վերջնարդյունքում պայքարն արդյունավետ չի լինելու,- «Առաջին լրատվական»- ի հետ զրույցում այս մասին ասաց Հայաստանի իրավաբանների ասոցիացիայի նախագահ Կարեն Զադոյանը: – Մյուս կողմից՝ պետք է հասկանանք, թե ինչ մարմինների միջոցով պետք է պայքարենք կոռուպցիայի դեմ: Հայաստանում մինչև թավշյա հեղափոխությունը, նաև դրանից հետո ընտրված է կոռուպցիայի դեմ ապակենտրոնացված պայքարի մոդելը: Հայաստանում կոռուպցիայի դեմ ապակենտրոնացված պայքարի մոդելը չի աշխատում: Ներկայումս իշխանությունները կոռուպցիայի դեմ պայքարի բեռը դրել են ԱԱԾ-ի վրա: Ես կարծում եմ՝ ԱԱԾ-ի հիմնական խնդիրը Հայաստանի անվտանգության ապահովումն է: Հրապարակված ձայնագրությունը ուղիղ սպառնալիք է ՀՀ ազգային անվտանգությանը»:
«ԱԱԾ-ն չի կարող կոռուպցիայի դեմ պայքարում իրականացնել կրթական և կանխարգելիչ գործառույթներ,- նշեց Կ. Զադոյանը: – Մենք դեռևս չունենք համապետական ծրագիր, որի շնորհիվ կոռուպցիան կդառնա անընդունելի յուրաքանչյուր քաղաքացու համար, և քաղաքացին չի ընտրի կոռուպցիոն ճանապարհը: Իսկ կոռուպցիայի կանխարգելումը օրենսդրությամբ, իրավական ակտերով կոռուպցիոն ռիսկերի սողանցքների փակումն է:
Կոռուպցիայի դեմ հախուռն պայքարում կարևորագույն քայլեր պետք է անել: Կոռուպցիայի դեմ պայքարում պետք է լինի համակարգային մոտեցում»:
Մանրամասն՝ տեսանյութում: