Հնդկաստանն այսօր իրականացրել է «Պրիտհվի II» բալիստիկ հրթիռի հաջող արձակում: Նշվում է, որ հրթիռն ունի մարտագլխիկ կրելու հնարավորություն: Այս մասին հայտնում է հնդկական PTI գործակալությունը՝ հղում անելով սեփական աղբյուրներին: Փորձարկումն անցկացվել է «Չանդիպուր» զորակայանում, որը գտնվում է երկրի արևելյան Օրիշա նահանգում:
Հրթիռի արձակումը տեղի է ունեցել տեղական ժամանակով ժամը 09:48-ին (Երևանի ժամանակով 08:18-ին): Փորձարկումն իրականացվել է միջուկային հրամանատարության հատուկ ստորաբաժանման վարժանքների շրջանակում: Այն անցկացվել է պաշտպանական հետազոտությունների ու մշակումների հնդկական կազմակերպության գիտնականների վերահսկողության ներքո:
«Պրիտհվի II»-ը «երկիր-երկիր» դասի հրթիռ է, որն աշխատում է հեղուկ վառելիքով շարժիչով: Այն կարող է 500 կգ-ից մինչև մեկ տոննա քաշով լիցքը տեղափոխել 350 հեռավորության վրա:
Հրթիռը պաշտպանական հետազոտությունների ու մշակումների հնդկական կազմակերպության առաջին այդօրինակ նախագիծն է: «Պրիտհվի II»-ի նախորդ փորձարկումները նույնպես անցկացվել են «Չանդիպուր» զորակայանում դեկտեմբերի 3-ին և հաջող ճանաչվել:
