«Սա խոսում է մեկ բանի մասին, որ մեր երկրի իմունիտետը մեծապես վտանգված է, որ մեր երկրում հնարավոր է նման բան։ Մնացածի վերաբերյալ այս պահին ես ձեռնպահ կմնամ որևէ մեկնաբանություն անելուց։ Պարզաբանումներ պետք է տա իշխանությունը՝ ինչպես է հնարավոր մեր երկրում նման բան։ Բոլորս սպասում ենք պարզաբանման, քանի որ սա մեկ բանի մասին է խոսում, որ մեր երկիրը, մեր երկրի անվտանգության իմունիտետը ուղղակիորեն վտանգված է»,-«Առաջին լրատվական»-ի հետ զրույցում ասաց ԱԺ «Ծառուկյան» խմբակցության պատգամավոր,
Նաիրա Զոհրաբյանը՝ անդրադառնալով նախօրեին ՀՔԾ և ԱԱԾ պետերի հեռախոսազրույցի գաղտնալսմանը։
Նա կոչ արեց Նիկոլ Փաշինյանին ասել, թե ովքեր են հակահեղափոխականները, սևերը․«Մենք էլ իրենց հետ հագնենք կամուֆլյաժներ, Երևանի ընտրությունները թողնենք մի կողմ։ Եվ Երևանի խնդիրները թողած՝ հայտարարվում է հեղափոխական երկրորդ մոբիլիզացիա, Սերժ Սարգսյանի և Ռոբերտ Քոչարյանի ատելության ֆոնի վրա մոբիլիզացիա ընդամենը մեկ բանի համար, որպեսզի առաջիկա ավագանու ընտրություններին հավաքել առավելագույնս ձայներ»,-հավելեց Երևանի ավագանու ընտրություններին «Բարգավաճ Հայաստան» կուսակցության ցուցակը կգլխավորող, Ազգային ժողովի «Ծառուկյան» խմբակցության պատգամավոր Նաիրա Զոհրաբյանը։