ԱՄՆ ամենաառաջատար էլեկտրացանցային ընկերություններից մեկը՝ PJM Interconnection-ը, դիմել է իր սպառողներին՝ խնդրելով խնայել էլեկտրականությունը՝ կապված ԱՄՆ-ի ներկայիս սարսափելի սառնամանիքների հետ:
Ընկերության ներկայացուցիչները, որոնք սպասարկում են 60 մլն-ից ավելի սպառողների՝ երկրի մայրաքաղաք Վաշինգտոնում ու 13 նահանգներում, խնդրել է իր սպառողներին խնայողաբար ծախսել էլեկտրաէներգիան առավոտյան ու երեկոյան պիկ ժամերին՝ հայտնում է ITAR-TASS-ը:
«Շարունակվող ուժեղ սառնամանիքները կարող են հանգեցնել էլեկտրաէներգիայի բարձր պահանջարկի: Դա կարող է առաջացնել բնական գազի դեֆիցիտ որոշ էլեկտրակայաններում, որոնք աշխատում են վառելիքի այդ տեսակով»,- ասվում է ընկերության հաղորդագրության մեջ:
Հիդրօդերևութաբանների կանխատեսումներով՝ այս գիշերը ԱՄՆ-ում կարող է դառնալ ռեկորդային ցուրտ Արևելյան ափի շատ շրջանների համար: Մասնավորապես, Վաշինգտոնում ջերմաչափի սնդիկի սյունը կարող է իջնել մինչև մինուս 15 աստիճան՝ ըստ Ցելսիուսի, ինչը չի դիտվել երկար տարիներ:
