Հունվարի հինգի երեկոյան Հայ Առաքելական եկեղեցին նշում է Քրիստոսի ծնունդը: «Առաջին լրատվական»-ի հետ զրույցում տեր Եսայի քահանա Արթենյանը խոսելով Քրիստոսի ծննդից, նշեց, որ Սուրբծննդյան խորհուրդը այն հավատքի մեջ է, որ իր ծննդով Քրիստոսն ամեն անգամ մեր հոգում ու սրտում վերածնվում է. «Սուրբծննդյան տոնը յուրաքանչյուրիս համար հոգևոր ուրախության, մխիթարության և նաև նորոգության տոն է, իմ ցանկությունն է, որ յուրաքանչյուր մարդու կյանքում մանուկ Հիսուսը ծնվի Աստվածային իր սիրով և Աստվածային ներկայությամբ մեր կյանքում առաջնորդի դեպի բարի գործերի, առաքինի ընթացքի և աստվածահաճո կյանքի»:
Նա նշեց, որ Քրիստոսի ծնունդը պարզապես հիշատակ չէ, որը պետք է նշել՝ ինչպես մեր ծննդյան տոներն ենք նշում, Քրիստոսի ծնունդն իրական մի պատմություն է, որի հանդեպ պետք է հավատքով լցվել:
Քահանայի կարծիքով՝ տոնական այս օրերին մարդիկ ավելի շատ ձևին են ուշադրություն դարձնում, քան բովանդակությանը, սակայն վերջին տարիներին մարդկանց մեջ էական փոփոխություն կա. «Ես կարող եմ փաստել, որ Նոր տարվա գիշերը եկեղեցում այնքան մարդ կար, որքան լինում է սովորական պատարագի օրերին: Այսինքն՝ ամեն տարի ավելանում է մարդկանց թիվը, ովքեր գալիս են եկեղեցի՝ աղոթքով սկսելու Նոր տարին և պահքով շարունակելու մինչև Սուրբ ծնունդ»:
