«Քոչարյանը փորձում է ռեստավրացիա լինել, իրեն վերականգնել: Նա նույն հանցագործն է, ինչ Սերժ Սարգսյանը և ընդամենը ուզում է իշխանության գալ՝ կոնկրետ փոխելով կառավարությունը, այդ ամբողջը ես ցնդաբանություն եմ համարում»,- «Առաջին լրատվական»-ի հետ զրույցում նման տեսակետ հայտնեց համակարգային փոփոխություն պահանջող ազատամարտիկ Սուրեն Սարգսյանը՝ անդրադառնալով Հայաստանի երկրորդ նախագահ Ռոբերտ Քոչարյանի վերջերս տված հարցազրույցին: «Կարող եմ ազատամարտիկների հրամանատարների անունից ասել, որ այդ պարոնայք իրենց ծոծորակը կտեսնեն՝ Հայաստանի իշխանությունը չեն տեսնի: Մենք հայտարարել ենք, որ փետրվարին բոլորին ճանապարհ ենք դնելու: Քոչարյանին էլ խորհուրդ ենք տալիս խելքը գլխին հավաքել և խաղեր չտալ, և ոչ էլ քոչարյանամերձ ինչ-որ մեկին»,- ասաց նա:
Մեր զրուցակիցը հավելեց, որ իրենք ամեն ինչ անելու են իշխանությանը վերահսկելու համար:
Մեր այն դիտարկմանը, թե քոչարյանամերձ ուժերի շարքին է դասվում նաև «Բարգավաճ Հայաստանը», որի հետ ազատամարտիկների խորհուրդը համագործակցում է, և որն էլ, ինչպես և Ռոբերտ Քոչարյանը, քննադատության հիմնական թիրախ է ընտրել ոչ թե գործող նախագահին, այլ վարչապետին, Սուրեն Սարգսյանն ասաց. «Ազատամարտիկները երբեք ոչ ոքի հետ չեն համագործակցել՝ ոչ ՀԱԿ-ի, ո՛չ ԲՀԿ-ի, ո՛չ ՀԺԿ-ի՝ ընդամենը ազատամարտիկները հանդիպել են բոլոր կուսակցություններին և ասել, որ մենք կարող ենք դառնալ մերան, որպեսզի դուք բոլորդ մի սեղանի շուրջ հավաքվեք և փորձեք այս երկրի վաղվա օրը պլանավորել: Դա է ազատամարտիկների համագործակցության ձևաչափը: Մենք՝ որպես 88-ի տղերք, պատրաստ ենք համագործակցել մեկ երևույթի շուրջ՝ Հայաստանում սահմանադրական կարգ հաստատելու»:
Նրա խոսքերով՝ գրեթե բոլորը համաձայն են, որ այսպես չի կարելի ապրել՝ տարբեր շեշտադրումներով. «Հիմա «Բարգավաճը» խոսեց, մտահոգություն հայտնեց կառավարության փոփոխության վերաբերյալ… այս հանցավոր համակարգը Սերժ Սարգսյանի կամ Ռոբերտ Քոչարյանի գլխավորությամբ պետք է այլևս Հայաստանում չգործի, որովհետև եթե փոխենք ընդամենը մեկ Տիգրան Սարգսյան՝ դա ոչ մի բան է, նա նույնիսկ տղամարդ էլ չի ներկայացնում:
Նույնն էլ Սերժ Սարգսյանի մասին կարելի է ասել՝ մեկին փոխելով ոչինչ չենք հասնի, պետք է համակարգ փոխվի, և այդ համակարգը պետք է վերահսկվի, մարդիկ պետք է իմանան, որ օրենքը բոլորի համար է ՝ այդ թվում նաև նախագահի և մյուսների: Համակարգը պետք է փոխվի, Ռոբերտ Քոչարյանը իր թալանած գումարները պետք է հետ վեադարձնի, և բոլորը պետք է ծառայեն Հայաստանին»,- եզրափակեց նա:
