«Նախորդ տարվա ընթացքում փոքր ձեռքբերումներ եղել են, բայց դա մեզ չի բավարարում: Եթե անկեղծ լինենք, այս 5-6 տարիների ընթացքում միայն ժողովրդի պարտադրանքի ներքո է հասարակությունն ինչ-որ բանի հասել, բայց արի ու տես, որ ժամանակը չի սպասում: Ստեղծված իրավիճակը բնակչությանը չի բավարարում»,-«Առաջին լրատվական»-ի հետ զրույցում ասաց «Ժողովրդավարական ուղի» կուսակցության նախագահ Մանուել Գասպարյանը՝ ամփոփելով 2013 թվականը:
Նրա խոսքով՝ մարդիկ չեն կարողանում արտագաղթի ճանապարհը մի կողմ դնել և պայքարի արդյունքում վաղվա օրը կառուցել. «Մինչև արտագաղթի տեմպերը մինիմալի չհասցնենք, ես բավարար չեմ համարի վերջին տարիների մեր արած գործողությունները: Բայց կարելի է ասել, որ տարեցտարի ժողովուրդն արթնանում և գտնում է, որ իր ձեռքերով պետք է կառուցի իր տունը և ոչ թե սպասի, որ ինչ-որ մեկը գա և կառուցի՝ ես դա դրական եմ գնահատում»,- ասա նա:
Գասպարյանը նշեց, որ դրական է նաև այն հանգամանքը, որ մարդու իրավունքների պաշտպանի գրասենյակն է սկսել ավելի անաչառ գնահատական տալ մի շարք ոտնահարումների, դատարաններում առկա խնդիրների վերաբերյալ. «Հասարակական կազմակերպությունները մի շարք իրադարձություններում դրական շարժ տեսան, շատ չնչին դրական քայլ կարելի է համարել»:
Մեր զրուցակիցը հույս հայտնեց, որ գալիք տարում շատ ավելի մեծ եռանդով պետք է պայքարել մեր վաղվա ապագան կերտելու համար. «Հօգուտ իշխանությունների գովերգի խոսք չլինի, ժողովրդի պահանջի ներքո է շատ չնչին դրական տեղաշարժ եղել այս տարի: Կուզենայի, որ հայի մտածելակերպը մի փոքր շուտ արթնանար: Այն, որ ժամանակին ժողովուրդը հույսը դրեց «Բարգավաճի» վրա, «Բարգավաճը» ինչ-որ չափով հապաղեց, ոտքը կախ գցեց՝ մտածելով կորուստների մասին, այդպես չլինի»:
Մանուել Գասպարյանը մաղթում է համբերություն և ցանկություն հայտնում, որ ապրենք մեկս մյուսի խնդիրներով, որ բոլորի մոտ լավ լինի. «Հարևանի խնդրով չապրելու դեպքում, վաղը դու ես խնդրի մեջ լինելու, հարևանին, բարեկամին չօգնելով և հայ ժողովրդին չօգնելով՝ վաղը մեր երկրում միայնակ և անօգնական վիճակում ենք հայտնվելու: Օգնենք մեկս մյուսին, այս ծանր ժամանակները հաղթահարենք»:
