«Կան սպիտակ և սև ուժեր․․․ մեր թիմի դեմ խաղ չկա․․․», – «Իմ քայլը» դաշինքի քաղաքապետի թեկնածու Հայկ Մարությանի այս արտահայտությունները բուռն քննադատության են արժանացել քաղաքական ուժերի կողմից: «Առաջին լրատվական»- ի հետ քննարկմանն անդրադառնալով Հ. Մարությանի ելույթին՝ իրենց դիտարկումները ներկայացրին Երևանի ավագանու «Բարգավաճ Հայաստան» կուսակցության թեկնածու Լյուդմիլա Սարգսյանը, «Իմ քայլը» դաշինքի թեկնածու Հրաչ Սարգսյանը և «Երևանի հանրություն» դաշինքի ավագանու թեկնածու Սիլվա Ադամյանը:
Հրաչ Սարգսյանը նշեց, որ ընդունում է վարչապետի կարծիքն այն մասին, որ դա լեզվի սայթաքում էր: «Անձամբ ճանաչում եմ Հայկ Մարությանին, նրա ելույթն իր բացասական արտացոլումը գտավ սոցցանցերում, բայց այնտեղ ամեն ինչ ուռճացված էր:
Պարոն Մարությանը հասարակությանը չի տարանջատել «սևի և սպիտակի», և ինչ որ բարիեր չի դրել՝ դուք մեզ հետ եք կամ մեզ հետ չեք: Նախընտրական արշավների ընթացքում դուք կտեսնեք ուրիշ Հայկ Մարությանի, որին դուք չէիք ճանաչում: Վստահ եմ, որ 10 օր հետո Հայկ Մարությանի մասին պատկերացումները կփոխվեն»,- նշեց «Իմ քայլը» դաշինքի թեկնածուն:
«Ես լսեցի Հ. Մարությանի ելույթը, և այն ինձ դուր չեկավ, ինչպես որ դուր չեկավ հանրությանը: «Սևի ու սպիտակի» խնդիրը, որ բարձրացվեց Հայկի կողմից, բավականին նեգատիվ տպավորություն թողեց հանրության վրա, և այդ հանրությունը այն մարդիկ չեն, որոնք սերտ համագործակցել են նախկին իշխանության հետ, այլ հասարակ մարդիկ են, հասարակական գործիչներ… Հայկ Մարությանի ելույթից հետո պայթյուն եղավ, – ընդգծեց Սիլվա Ադամյանը: – Երբ որ ինչ-որ խնդրի վերաբերյալ քաղաքական ուժի ներկայացուցիչը ելույթ է ունենում, պետք է պատրաստված ելույթ ունենա, քաղաքականությունը փողոցային ակցիա չէ, միտինգ չէ, որտեղ, թերևս, կարելի է անպատրաստ խոսել»:
Լյուդմիլա Սարգսյանի դիտարկմամբ՝ քաղաքականության մեջ սայթաքումները շատ ծանր հետևանքներ են ունենում: «Ես չեմ կարող պնդել, թե նա ենթագիտակցության մեջ ինչ է նկատի ունեցել: Մենք տարբեր թիմեր ենք ներկայացնում, բայց չենք ուզում սևացնել, չենք ուզում ո՛չ սև դաշտում լինել, ո՛չ սպիտակ: Մենք բոլորս երևանցիներ ենք և ուզում ենք ունենալ բարեկարգ, ապահով, կանաչ Երևան, և բոլորիս աշխատանքն այդ ուղղությամբ պիտի գնա,- նշեց Լ. Սարգսյանը: – Մեր բոլորի խնդիրը պիտի լինի արդար և թափանցիկ ընտրություններին զուգահեռ ձևավորել նաև այլ ընտրական մթնոլորտ՝ հանդուրժողականություն և բարյացակամություն ցուցաբերել միմյանց նկատմամբ»:
Մանրամասն՝ տեսանյութում:
