«2013 թվականին դատաիրավական համակարգում ես բարեփոխումներ չտեսա»,- «Առաջին լրատվական»-ի հետ զրույցում ասաց նախկին դատավոր Պարգև Օհանյանը՝ խոսելով 2013 թվականի դատաիրավական համակարգի գործունեության մասին:
Նրա խոսքերով՝ անհրաժեշտ է խնդիրների լուծման համալիր մոտեցում, միայն մեկ խնդրի վրա ուշադրություն դարձնելն և մյուսը անտեսելը ճիշտ չէ. «Անձամբ ես 2014 թվականին կուզենայի տեսնել լիովին բարեփոխված դատական համակարգ:
Պատկերացնելով ամողջ դատավարությունը սկզբից մինչև վերջ՝ եռափուլ՝ հետաքննություն, նախաքննություն և դատաքննություն, միանշանակ ասում եմ, որ կուզենայի տեսնել նոր որակներ: Որքանով ծանոթ եմ քրեական դատավարության նոր օրենսգրքի նախագծին՝ բավական առաջադեմ, լավ բաներ կան՝ խոսվել է մեղադրյալի ցուցմունքի դեպոնացման մասին, որը բավականին մտավախություններ է առաջացնում: Կան շատ լավ գաղափարներ. եթե դրանք կյանքի կոչվեն, լավ կլինի, մասնավորապես՝ կապված խափանման միջոցների հետ»:
Օհանյանը հավելեց, որ հետաքննություն կոչվածը ինքը կուզենար տեսնել նոր որակների մեջ, այսինքն՝ այնպես, ինչպես որ մենք տեսնում ենք զարգացած երկրներում՝ սկսած ամենահասարակ գործողությունից, ասենք՝ հանցագործության մասին հաղորդում ընդունելուց. «Կուզենայի քրեական գործ հարուցվեր միայն համապատասխան հիմքերի առկայության դեպքում՝ կախված տարվող հետաքննությունից կամ կատարվող հետաքննչական գործողությունների արդյունավետությունից և որակից, նախաքննություն կոչված փուլի ամենասահմանափակ ժամկետներից՝ երկու ամիսը պետք է լինի մաքսիմում ժամկետը, միայն բացառիկ դեպքերում՝ ավելի երկար, որից հետո գործն անմիջապես պետք է դատարան մտնի: Որպես միակ արդարադատություն իրականացնող մարմին՝ կուզենայի տեսնել դատարանը, ոչ թե ինչպես այժմ՝ փաստացի նախաքննությունն ինքն է արդարադատություն իրականացնում»:
Նրա խոսքերով՝ դատական համակարգում կարող է բարեփոխում մտցնել Մարդու իրավունքների պաշտպանի գրասենյակի տարեվերջյան արտահերթ զեկույցը. «Չնայած ՄԻՊ-ը նոր բան չասաց, Ամերիկա չհայտնագործեց և ասաց այն, ինչ շատերիս կողմից ասվում էր, այդուհանդերձ՝ կարծում եմ, որ այն դրական ազդեցություն կունենա: Եթե անգամ մեկ հոգի՝ դուք կամ ես ենք այդ մասին խոսում, միշտ հույս ենք ունենում, որ ուշադրություն կդարձվի այդ ամենի վրա. հուսամ, որ այդքան անտարբեր չեն գտնվի»:
2014 թվականի համար այս համակարգում Պարգև Օհանյանն ուզում է տեսնել իրավապահներին՝ իրավապահ, դատարաններին՝ արդարադատ, օրենքները՝ օրինական, մարդկանց էլ՝ իրավապաշտ:
