ԱՄՆ Ազգային անվտանգության գործակալությունը մշակում է համակարգիչ, որը կկարողանա «կոտրել» ծածկագրում իրականացնող համակարգչային ծրագրերի մեծ մասը՝ անկախ այն բանից՝ դրանք օգտագործվում են այլ պետությունների պետական գաղտնիքնե՞րը, թե՞ անհատական բանկային հաշիվները պաշտպանելու համար:
«Ամերիկայի ձայն»-ի փոխանցմամբ՝ այս մասին տեղեկացրել է «Վաշինգտոն Փոստ» ամերիկյան պարբերականը՝ նշելով, որ հաղորդագրության համար հիմք են ծառայել ԱՄՆ-ի ԱԱԳ-ի պայմանագրային նախկին ծառայող Էդվարդ Սնոուդենի կողմից հրապարակված նյութերը:
Ըստ պարբերականի՝ Ազգային անվտանգության գործակալությունն աշխատում է, այսպես կոչված, «քվանտային համակարգչի» մշակման ուղղությամբ, որը գործակալությանը հնարավորություն կընձեռի «կոտրել» զգայուն տեղեկությունները պաշտպանող ծածկագրերը:
Նման համակարգիչը կկարողանա միաժամանակ կատարել բազմաթիվ հաշվարկներ, սակայն դրա մշակման համար կպահանջվի առնվազն մի քանի տարի: Բացի այդ, քվանտային համակարգիչը հնարավոր կլինի կիրառել նաև բժշկության բնագավառում:
Համակարգչի ստեղծման ուղղությամբ աշխատանքներն իրականացվում են 79.7 միլիոն դոլար արժողությամբ «Դժվար թիրախների ներթափանցում» ծրագրի շրջանակներում:
Քվանտային համակարգչի մշակման ուղղությամբ աշխատում են նաև պետական կազմակերպությունների կազմում չաշխատող գիտնականները, սակայն դեռևս պարզ չէ՝ արդյոք ԱՄՆ ԱԱԳ-ի կողմից իրականացվող հետազոտական աշխատանքներն առա՞ջ են անցել այլ հետազոտողների կողմից իրականացվող հետազոտություններից:
