Այսօր Դուշանբե է ժամանել ՆԱՏՕ-ի գլխավոր քարտուղարի` Հարավային Կովկասի և Կենտրոնական Ասիայի հարցերով հատուկ ներկայացուցիչ Ջեյմս Ափաթուրայը: Այս մասին գրում է Независимая газета-ն` նշելով, որ այցը տեղի է ունենում այն օրերին, երբ Ռուսաստանի և Տաջիկստանի միջև պետք է ստորագրվի սահմանային համագործակցության մասին պայմանագիրը: Թերթի հոդվածագիրն ամենևին էլ պատահական չի համարում, որ այցը համընկել է ռուս-տաջիկական համագործակցության համատեքստում այս կարևոր փաստաթղթի ստորագրման հետ:
Տաջիկստանի արտաքին գործերի նախարարությունում թերթի աղբյուրը բացառել է, որ Ապաթուրայի այցը և ռուս-տաջիկական պայմանագրի ստորագրումը որևէ ձևով կապված են` միաժամանակ նշելով, որ «չի բացառվում սահմանային հարցերի քննարկումը ՆԱՏՕ-ի հատուկ ներկայացուցչի և Տաջիկստանի ղեկավարության բանակցությունների ժամանակ»` կապելով դա Աֆղանստանում տեղի ունեցող զարգացումների հետ:
Սա Ափաթուրայի առաջին այցը չէ տարածաշրջան: Մայիսին նա ստացել էր Ղազախստանի և Ղրղզստանի աջակցությունը աֆղանական հարցում` դրա փոխարեն խոստանալով աջակցություն այդ երկրներին մի շարք հարցերում, որոնք կապված են ռազմական ոլորտի հետ: Հիմա Տաջիկստանը ևս ակնկալում է Հյուսիսատլանտյան դաշինքի աջակցությունը մասնավորապես Պյանջ գետի վրա կառուցվելիք մեկ կիլոմետրանոց կամրջի, ինչպես նաև տաջիկ զինվորականների մարզման հարցերում: Փորձագետները նշում են, որ Տաջիկստանի ոչ բոլոր ակնկալիքներն են արդարացել ՆԱՏՕ-ից ստացվող աջակցության առումով, քանի որ ժամանակին նրանք ակնկալում էին, որ իրենց տարածքում կտեղակայվի ՆԱՏՕ-ի ռազմաբազա` ղրղզական Մանասի օրինակով: Մանավանդ, որ «Այնի» ռազմաբազան Տաջիկստանում ազատ է և պարապուրդի է մատնված:
Թերթին հայտնած կարծիքում Ռուսաստանի գիտությունների ակադեմիայի Արևելագիտության ինստիտուտի ավագ գիտաշխատող Ալեքսանդր Կնյազևն ասել է, որ ԱՄՆ-ն է շահագրգռված Կենտրոնական Ասիայի երկրների հետ համագործակցության հարցում: Նա նշել է, որ ԱՄՆ-ն ոչ թե ցանկանում է լքել Աֆղանստանը, այլ տեղափոխել իր զորամիավորումները նրան հարևան երկրներ, որպեսզի ապահովվի տարածաշրջանում նրա ներկայությունը:
