«Օգոստոսի 17-ի հանրահավաքը փայլուն տպավորություն է թողել՝ իր մթնոլորտով, ազատ մարդկանց ազատ կամքի դրսևորմամբ, նոր երևույթներով և հույսերով և այն զգացողությամբ, որ միասին կարող ենք ամեն ինչ անել մեր երկրում,- «Առաջին լրատվական»-ի հետ զրույցում այս մասին ասաց ԱԺ նախկին պատգամավոր, ՄԱԿ նախագահ Գուրգեն Արսենյանը:
«Տպավորություն կա, որ հին իշխանությունները և մենք տարբեր դարաշրջանների մարդիկ ենք. մենք խոսում ենք մի Հայաստանի մասին և ապրում ենք մի Հայաստանում, որն ազատ և անկախ մարդկանց հայրենիք է, իսկ նրանք խոսում են մի Հայաստանի մասին, որտեղ վաղ ֆեոդալական կամ ուշ ստրկատիրական հասարակարգի դրսևորում էր, որի կերտողն իրենք էին, և որը Հայաստանի բնակիչների միահամուռ ջանքերի ու ազատության տենչի շնորհիվ մնաց պատմության աղբանոցում,- նշեց Արսենյանը: – Թող ժողովրդավարությունից խոսելուց առաջ հիշեն իրենց հանցանքները»:
Արսենյանի դիտարկմամբ՝ Հայաստանի հանրապետությունում երկու տասնամյակից ավելի գործել է հանցավոր համակարգ, որը քողարկվել է օրենքներով, ենթաօրենսդրական ակտերով, դատարանների վճիռներով: Նա ընդգծեց, որ ավարտվել է «մարդակերների» դարաշրջանը և հավելեց. «Մինչև արյան վերջին կաթիլը պատրաստ ենք պայքարել, որպեսզի չլինի վերադարձ ֆեոդալական կարգերին»:
Մանրամասն՝ տեսանյութում: