ՆԱՏՕ-ն շարունակում է «բաց դռների» քաղաքականությունը և վերահաստատում է աջակցությունը Վրաստանի ինքնիշխանությանն ու տարածքային ամբողջականությանը, այս մասին հայտարարել է ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը` օտարերկրյա լրագրողների հետ Վաշինգտոնում կայացած հանդիպմանը, հաղորդում է Новости-Грузия-ն` հղում կատարելով «Ռուսթավի-2» հեռուստաընկերությանը:
Գորդոնի խոսքով, «Վրաստանի թեմայի շուրջ Ռուսաստանի և ԱՄՆ միջև պահպանվում են տարաձայնությունները: ՆԱՏՕ-ն նույնպես պարզորոշ հայտարարել է Վրաստանի շուրջ Ռուսաստանի հետ ունեցած տարաձայնությունների մասին: «ՆԱՏՕ-ի անդամները հայտարարել են, որ ցանկանում են տեսնել հրադադարի վերաբերյալ 2008թ. օգոստոսի 12-ի համաձայնագրի ամբողջական կատարում: ՆԱՏՕ-ի բոլոր անդամները հարգում և ճանաչում են Վրաստանի ինքնիշխանությունն ու տարածքային ամբողջականությունը: Նրանք այդ դիրքորոշումը կպաշտպանեն Լիսաբոնի գագաթնաժողովում»,-հայտարարել է Գորդոնը: Ավելի վաղ եվրոպական և եվրատլանտյան կառույցներին ինտեգրման հարցերով Վրաստանի պետնախարար Գեորգի Բարամիձեն լրագրողներին հայտարարել է, որ Վրաստանն արմատական տեղաշարժեր չի սպասում ՆԱՏՕ-ի լիսաբոնյան գագաթնաժողովից, բայց երկիրն ունի բոլոր գործիքները, որոնք հնարավորություն են տալիս առաջ շարժվելու դաշինքին անդամագրվելու ճանապարհով:
«Դա շատ կարևոր գագաթնաժողով է, որտեղ կհաստատվեն շատ կարևոր քաղաքական որոշումներ այն մասին, որ Վրաստանը կդառնա ՆԱՏՕ-ի անդամ: Նաև հուսով ենք, որ դաշինքի անդամները մեկ անգամ ևս իրենց աջակցությունը կհայտնեն Վրաստանի տարածքային ամբողջականությանն ու ինքնիշխանությանը»,- նշել է Բարամիձեն: Նրա խոսքով, Վրաստանին որոշ ժամանակ է անհրաժեշտ այն բոլոր բարեփոխումներն անցկացնելու համար, որոնք երկրին թույլ կտան հայտարարելու, որ պատրաստ է անդամակցելու ՆԱՏՕ-ին:
