Երեկ տեղացած կարկուտը Արմավիրի մարզի մոտ 13 գյուղի մեծ վնասներ է հասցրել։ Առաջին լրատվականի նկարահանող խումբը տեղում ծանոթացավ իրավիճակին։ Հոկտեմբեր գյուղում խաղողի, ձմերուկի, սալորի հեկտարների հասնող այգիները ոչնչացել են։ Մեր նկարահանած կադրերը պարզապես սարսափելի էին։ Կարկուտը խաղողի հենասյուները հավասարեցրել էր հողին։ Անզեն աչքով նկատելի է, որ գյուղացին այս սեզոնին 100 տոկոս վնաս է կրել։ Նույն պատկերն էր ձմերուկի դաշտերում։ Պատկերը իսկապես ողբերգական էր։ 6-7 հազար մետր ձմերուկի դաշտում գեթ մեկ հատ ձմերուկ չկար, որը պիտանի կարող էր լինել օգտագործման համար։ Ամբողջը կարկտահարված, մասերի բաժանված էր։
Մեզ հետ զրույցում այգիների տերերը մտահոգություն հայտնեցին՝ ի՞նչ պետք է անեն, վարկերն ինչպե՞ս պետք է վճարեն։ Նախորդ կառավարությունները երբեք չեն փոխհատուցել բնության հասցրած վնասները, հիմա էլ առանձնապես հույս չունեն։ Հոկտեմբեր գյուղի բնակիչ Արմեն Հովհաննիսյանը նշեց՝ մոտ 10 միլիոն դրամի վնաս է կրել կարկուտի հետևանքով։ Գյուղացիները նաև նշեցին, որ առավոտյան մարզպետը եղել է մի քանի գյուղում, սակայն այս պահին դեռ հստակ տեղեկություն չկա՝ պատճառված վնասի չափի, փոխհատուցման պայմանների և այլնի մասին։
Մանրամասները՝ տեսանյութում
