Սեդրակ և Անդրանիկ Զատիկյանների սպանության պատվիրատուներից Նարեկ Խաչատրյանի նոր պաշտպան Ղազարյանը օգոստոսի 6-ին «մոռացել» էր գալ դատարան և կատարել փաստաբանական ծառայություններ մատուցելու պայմանագրով՝ իր ստանձնած պարտականությունները:
Ղազարյանը, նախապես և անձամբ ծանուցված լինելով նշանակված դատական նիստի մասին, չէր եկել դատարան և որևէ մեկին, նույնիսկ իր պաշտպանյալին կամ դատարանին չէր տեղեկացրել բացակայելու և դրա պատճառի մասին:
Ինչպես պարզվեց դատական նիստի ընթացքում, մինչ այդ պաշտպանը նույնիսկ դատարանին չէր դիմել գործի նյութերին ծանոթանալու համար: Իսկ դա նշանակում է՝ կա՛մ պայմանագիր չի կնքվել անձի հետ, կա՛մ կնքվել է, բայց նա անբարեխղճորեն է կատարում իր պարտականությունները, կա՛մ պաշտպանյալին «բարեխղճորեն» «մոռանալը» ուղղակի պաշտպանական տակտիկա է:
Առավել հավանական է երրորդ տարբերակը, ինչի մասին դատարան ուղարկած գրության մեջ նշել էր տուժողի իրավահաջորդի ներկայացուցիչ Վաղարշակ Գևորգյանը: Վիրահատությունից հետո նա չէր կարողացել գալ դատարան: Խնդրել էր իր բացակայությունը համարել հարգելի և նշել, որ այն խոչընդոտ չէ տվյալ դատական նիստը շարունակելու համար, քանի որ Վերաքննիչ բողոքների հետ կապված անհրաժեշտ պարզաբանումներն ինքն արդեն տվել է, լսել է պաշտպանական կողմի, դատավարության մասնակիցների պատասխանները:
Փաստաբանը գրության մեջ արտահայտել էր նաև իր և իր վստահորդի դժգոհությունը՝ պաշտպանական կողմի պատճառով անհիմն հետաձգվող դատավարության կապակցությամբ, ինչպես նաև դատարանից՝ դատավարության ողջամիտ ժամկետները խախտելու առիթով: Խնդրել էր՝ այսուհետև դատական նիստերը նշանակել ոչ թե երկարաժամկետ ընդմիջումներով, այլ սեղմ ժամկետներով, քանի որ ամբաստանյալը, օգտվելով իր իրավունքից, կարող է կրկին փոխել պաշտպանին դատը հետաձգելու համար:
Դատարանը նախ հետաքրքրվեց ամբաստանյալ Նարեկ Խաչատրյանից, թե ուզո՞ւմ է պաշտպան ունենալ, և ինչու իրենք տեղյակ չեն իրենց պաշտպանից: Ամբաստանյալը, դատարանի հարցին ի պատասխան, ասաց, որ ուզում է պաշտպան ունենալ, բայց չպատասխանեց դատավորի կողմից մի քանի անգամ հնչեցված հարցին, թե ինչպես անեն, որ նրա պատճառով անհիմն չհետաձգվեն Վերաքննիչ դատարանում արդեն մեկ տարի քննվող և դատաքննության եզրափակիչ մաս հասած գործը:
Դատարանը, լսելով կողմերի կարծիքները, դատական նիստը ստիպված հետաձգեց մինչև սեպտեմբերի 6-ը, քանի որ դատարանի կազմից Ռուբիկ Մխիթարյանը պետք է օգտվի իր արձակուրդից:
