«Հին և նոր ստեղծվող համակարգերի միջև պայքարը երկար է տևելու, որովհետև դեռևս կան ֆինանսական հնարավորություններին տիրապետող խոշոր գործող անձինք, որոնք ունեն նյութական շահագրգռություն»,- «Առաջին լրատվական»-ի հետ զրույցում նշեց քաղաքագետ Հայկ Բալանյանը:
Քաղաքագետի խոսքով՝ դրանք այն մարդիկ են, ովքեր օգտվելով հին համակարգի ընձեռած քրեական հնարավորությունից՝ ապօրինի հարստացել են, բյուջեն մսխել, մենաշնորհներ հաստատել, ուստի նրանք այդքան հեշտ չեն հանձնելու իրենց դիրքերը, և հին համակարգը երկար է դիմադրելու:
Դիտարկմանը՝ հնարավո՞ր է, որ Քոչարյանը դառնա հակահեղափոխության սիմվոլը, և այդ մարդիկ հավաքվեն հենց նրա շուրջը, Հայկ Բալանյանը պատասխանեց. «Նրա շուրջը չեն հավաքվի, նրա շուրջը հավաքված չէին նաև այն ժամանակ, երբ նա շատ ավելի մեծ հնավորություններ ուներ:
Խնդիրն այն է, որ Ռոբերտ Քոչարյանին օգտագործում են որպես մի կերպար՝ պայքարելու այս իշխանության դեմ»:
Մեր զրուցակիցը Ռոբերտ Քոչարյանին հանրապետականների աջակցությունը բացատրում է հետևյալ կերպ. «Այդ աջակցությամբ ընդդիմության դրոշակը դառնում է Ռոբերտ Քոչարյանը, գլխավոր գործող անձը դառնում է Ռոբերտ Քոչարյանը, և գլխավոր մեղադրյալն է դառնում Ռոբերտ Քոչարյանը: Այդ աջակցությամբ նաև Քոչարյանին զրկում են ավել ցուցմունքներ տալու գայթակղությունից, իսկ Սերժ Սարգսյանը մնում է ստվերում»:
Քաղաքագետի կարծիքով՝ այս կերպ Սերժ Սարգսյանը մի կողմից՝ ճնշում է իշխանությանը, մյուս կողմից՝ փակում է Քոչարյանի բերանը:
Հարցազրույցն ամբողջությամբ՝ տեսանյութում:
