Հրապարակվել է Մալայզիայի կառավարության վերջնական զեկույցը Boeing 777-200 անհետացման վերաբերյալ, որը 2014 թվականին, MH370 չվերթով, Կուալա-Լումպուրից Պեկին էր մեկնում:
Փորձագետներն այդպես էլ չեն կարողացել պարզել օդանավի անհետացման պատճառները,- վերջնական հաշվետվության ներկայացման ժամանակ հայտարարել է աղետի պատճառները հետաքննող մալայզիական հանձնաժողովի նախագահ Կոկ Սու Չոնը: Ընդ որում, նրանք չեն բացառում երրորդ կողմի միջամտության հնարավորությունը:
Նշվում է, որ փնտրման և փրկարարական աշխատանքները չափազանց ուշ են սկսվել և այդ պատճառով հետազոտողները չեն կարողանում պարզել աղետի պատճառը. այդ գործընթացի համար անհրաժեշտ են ինքնաթիռի բեկորները:
Նշվում է, որ զեկույցի հետ ծանոթանալու հնարավորություն են ստացել նաև զոհվածների բարեկամները. փաստաթղթից նրանք նույնպես որևէ նոր տեղեկատվություն չեն ստացել ինքնաթիռի անհետացման վերաբերյալ:
Հիշեցնենք, որ Boeing-ն անհետացել է ռադարներից Կուալա-Լումպուրից թռչելուց 40 րոպե անց՝ 2014 թվականին: Օդանավն անհետացել է Հնդկական օվկիանոսի վրա: Օդանավում 239 ուղևոր է եղել: Մինչև օրս ոչ օդանավի բեկորները, ոչ ուղևորների դիակները չեն հայտնաբերվել:
