Հայաստանի երկրորդ նախագահի անվան շուրջ ծավալվող իրադարձությունները գրավել են զանգվածային լրատվության գրեթե բոլոր տիրույթները։ Անկեղծ ասած, տեղի է ունենում մի բան, որին քչերն էին հավատում, ինչպես շատերը չէին հավատում, որ Հայաստանի քաղաքացին ունակ է ինքնակազմակերպվել թավշյա հեղափոխություն իրականացնողի համարձակությամբ։ Ամեն դեպքում, դեպքերը զարգանում են այնքան արագ, որ կարող է հեղափոխության շարունակության տպավորություն թողնել։ Բայց եթե հեղափոխության գերնպատակը իսկապես սահմանադրականության վերադարձն է Հայաստան, ուրեմն ամեն ինչ և ամեն ոք ենթակա է այդ նպատակին, անգամ այն քաղաքական ուժերը, որոնք քննչական գործողությունները մարտի մեկի գործով անցնող պաշտոնյաների նկատմամբ քաղաքական հաշվեհարդար են որակում։
Մարտի 1-ի դեպքերի կապակցությամբ Հայաստանի երկրորդ նախագահ Ռոբերտ Քոչարյանին և օրվա իշխանությունների այլ ներկայացուցիչների՝ սահմանադրական կարգը տապալելու մեղադրանք ներկայացնելը խիստ մտահոգիչ է և կարող է մեկնաբանվել որպես քաղաքական հալածանք՝ ասված է ՀՅԴ Հայաստանի Գերագույն մարմնի տարածած հայտարարության մեջ։ ՀՅԴ-ն փաստորեն դարձավ առաջին կուսակցությունը, որը պաշտոնապես սատարեց Ռոբերտ Քոչարյանին։ Այսպիսով, քաղաքական և իրավական ինչ զարգացումներ են հավանական մարտի մեկի գործի բացահայտման ճանապարհին:
Թեմայի քննարկմանը «Առաջին լրատվական»- ի տաղավարում մասնակցեցին իրավապաշտպաններ Ժաննա Ալեքսանյանը և Վարդան Հարությունյանը և ԳԽ նախկին պատգամավոր Ազատ Արշակյանը:
Այս օրերին այնպիսի տպավորություն է, որ հեղափոխության շարունակական փուլենք ապրում: Ազատ Արշակյանի դիտարկմամբ՝ տեղի է ունենում հասունացման ակցիա. հարգանք հայկական պետության նկատմամբ: «Մենք գործ ունենք մարդկանց հետ, ովքեր թիրախավորել են Հայաստանի ժողովրդավարական հանրապետությունը, այսինքն՝ ժողովրդի կամքը: Սա իսկապես հեղափոխություն է. հայկական պետությունը ինքնապաշտապնվում է… Ռ. Քոչարյանին և նրա գործընկերներին, միևնույն է, հասնելու էր արդարադատությունը: Հայկական պետությունը հասունացել է այնքան, որ կարողանում է պաշտպանվել՝ չհարցնելով նրա դափնիների քանակը. եթե հանցանք է գործել, պիտի պատժվի»,- նշեց Ա. Արշակյանը:
Վ. Հարությունյանի դիտարկմամբ՝ զարմանալի ոչինչ տեղի չի ունենում, ակնհայտ է, որ հանցագործությունը պետք է պատժվի արդար դատավարությամբ: «Այն, որ բարձրաստիճան պաշտոնյաներն այսօր դատարանի առաջ են կանգնում, Հայաստանի համար է նորույթ, աշխարհի համար նորույթ չէ: Բարձրաստիճան պաշտոնյաները պետք է իմանան, որ անկասկած, գալու է հատուցման պահը»,- նշեց իրավապաշտպանը՝ ընդգծելով, որ արյունը ջրով չի լվացվում, հնարավոր չէ պատասխան չտալ թափված արյան համար:
Ժաննա Ալեքսանյանը, բարձր գնահատելով ընթացքող պրոցեսը, նշեց. «Սա կարծես մի սև շերտ է հանելու, արդարության և արդարադատության վերականգնում է լինելու և անպատժելիության վերացման: Ամեն ինչ պետք է անել գործընթացը ավարտին հասցնելու համար: Քոչարյանը նույն անպատժելի կեցվածքով հարցազրույց էր տալիս, զղջման ու ափսոսանքի նշույլ չկար դեմքին: Իրեն դրել է անպատժելիի, անտեղյակի կարգավիճակում, սակայն համոզված եմ, Ռ. Քոչարյանը կալանավորվելու է, քանի որ ինքն է Մարտի 1-ին տեղի ունեցածի պատասխանատուն»:
«Քոչարյանը մոլորված է, նա ցուցմունք տվեց «հարիֆների» դեմ,- ընդգծեց Ա. Ազատյանը: Նա նաև կարծիք հայտնեց, որ ՀՅԴ-ն սխալ արեց, իր վարկը փչացրեց և իր կյանքը կրճատեց՝ հանդես գալով ի պաշտպանություն Ռ.Քոչարյանի:
Մանրամասն՝ տեսանյութում:
