Ադրբեջանական Contact.az կայքի փոխանցմամբ՝ ԵԽԽՎ ամառային նստաշրջանին հրավիրված ադրբեջանցի նախկին քաղբանտարկյալ, լրագրող Էյնուլա Ֆաթուլաևը հրաժարվել է հանդիպել ԵԽԽՎ թուրք նախագահ Մեվլյութ Չավուշօղլուի հետ։ Այս մասին Turan գործակալությանն անձամբ հայտնել է Ֆաթուլաևը՝ չնշելով մերժման պատճառը։
Սակայն ակնհայտ է, որ Ֆաթուլաևի նման վարքի պատճառն ադրբեջանական իշխանությունների հանդեպ Չավուշօղլուի ունեցած դիրքորոշումն է։ Վերջինս ակնհայտորեն աջակցում է ադրբեջանական իշխանություններին և աչք է փակում Ադրբեջանում մարդու իրավունքների խոշոր խախտումների վրա։
Երեկ Ֆաթուլաևը հանդիպումներ է ունեցել ԵԽ-ում Ֆրանսիայի, Ռումինիայի և Սլովակիայի դեսպանների, ինչպես նաև Ադրբեջանի գծով ԵԽԽՎ-ում նախկին զեկուցող, ներկայումս ԵԽԽՎ-ում Էստոնիայի պատվիրակության ղեկավար Անդրես Հերկելի հետ։
Այսօր Ֆաթուլաևը պետք է հանդիպումներ ունենա Մարդու իրավունքների գծով ԵԽ կոմիսար Թոմաս Համարբերգի և ԵԽ գլխավոր քարտուղար Թյորբորն Յագլանդի հետ։
Իր ամփոփիչ խոսքում Ֆաթուլաևը նշել է. «Այսօր ինձ հայտնեցին, որ ԵԽ Նախարարների կոմիտեն հունիսի 9-ին նորից դիտարկել է իմ գործը՝ կապված Մարդու իրավունքների եվրոպական դատարանի (ՄԻԵԴ) որոշման կիրառման հետ և Ադրբեջանի կառավարությանը պարտադրել է ինձ վճարել 27.500 եվրո փոխհատուցում»։
Հիշեցնենք, որ շուրջ 1 ամիս առաջ Չավուշօղլուն ողջունել էր Ադրբեջանի նախագահ Իլհամ Ալիևի համաներման հրամանը, որի շնորհիվ ազատ էր արձակվել նաև էյնուլա Ֆաթուլաևը:
2007 թվականի հոկտեմբերի 30-ին Բաքվի դատարանը Քրեական օրենսգրքի 214-րդ հոդվածի 1-ին կետով (ահաբեկչական սպառնալիք), 213-րդ հոդվածի 2-րդ կետով (հարկերից խուսափում) և 283-րդ հոդվածի 2-րդ կետով (ազգամիջյան թշնամանքի հարուցում) «Ռեալ Ադրբեջան» և «Ամենօրյա Ադրբեջան» անկախ թերթերի հիմնադիր Ֆաթուլաևին դատապարտեց 8.5 տարվա ազատազրկման:
Ֆաթուլաևի գործը բաղկացած էր 19 հատորից, որից 17-ը վերաբերում էր հարկերից խուսափելուն: Միջազգային հանրությունն անհեթեթություն է անվանել Ֆաթուլաևին ներկայացված այդ մեղադրանքները:
Ֆաթուլաևը «Ռեալ Ադրբեջանի» համարներից մեկում նշել էր, որ Իրանին հարված հասցնելու հարցում Բաքվի կողմից ԱՄՆ-ին աջակցելը խոցելի է դարձնում Ադրբեջանը և կարող է հանգեցնել Իրանի կողմից Ադրբեջանին ռազմական հարված հասցնելուն: Ֆաթուլաևը նշել էր նաև իրանական հավանական հարվածների ադրբեջանական թիրախները:
