«Հանուն Հայաստան պետության» ճակատը քաղաքացիական խաղաղ անհնազանդության գործընթացի կողմնակից է եղել և տեսականորեն ոչ մի երկրում չի կարող բացառվել զինված ապստամբության հնարավորությունը և իրավունքը, երբ մարդիկ չեն կարողանում խաղաղ ճանապարհով հասնել իրենց իրավունքների իրացմանը։ Այս մասին «Առաջին լրատվական»-ի հետ զրույցում նշեց «Ժառանգություն» կուսակցության նախագահ, «Հանուն Հայաստան պետության» ճակատի անդամ Արմեն Մարտիրոսյանը, անդրադառնալով Ալեք Ենիգոմշյանի հայտարարությանը։
Ենիգոմշյանը մեզ հետ զրույցում ասել է․ «Այնքան ժամանակ, քանի դեռ խաղաղ պայքարի ճանապարհները փակված են, զինված պայքարն ընդունելի է»։ Նա նշել է, թե իհարկե, հիմա իրավիճակ է փոխվել, «բայց եթե իրավիճակը կրկնվի, և կրկնում եմ, խաղաղ ճանապարհով հնարավոր չլինի իրավունքների վերադարձը, ապա ոչ խաղաղ ճանապարհով գործողությունները կդառնան օրինաչափ»։
Մարտիրոսյանի խոսքով՝ մենք տեսնում ենք, որ Հայաստանում խաղաղ անհնազանդությամբ հնարավոր է հասնել իշխանափոխության, ինչը և տեղի ունեցավ։ «Ես հասկանում եմ «Սասնա ծռերի» մեր հայրենակիցների արածի պատճառները և եթե ուշադրություն դարձնեք, ըստ էության, այսօր մարտի 1-ով հարուցվել է քրգործ, որտեղ որպես հոդված նշվում է բանակի օգտագործմամբ՝ իշխանության յուրացումը, իսկ եթե մի իշխանություն բանակն է օգտագործում իշխանություն պահելու համար, ակնհայտ է, որ քաղաքացիների մոտ կլիներ ցանկություն՝ զենքով հարցերը լուծելու։
Ուստի, «Սասնա ծռերի» տրամաբանությունը խիստ հասկանալի էր, հատկապես ապրիլյան քառօրյայից հետո։ Իհարկե տարբեր միավորներ, տարբեր կարծիքներ ունեն, բայց ես, ցանկացած դեպքում, որքան էլ հասկանամ զինվցած պայքարի իրավունքը կամ այլ ճանապարհ չլինելը, խաղաղի կողմնակից եմ»,- ասաց Մարտիրոսյանը և ավելացրեց․ «Ցանկացած դեպքում շատ լավ է, որ այսօր երկրում կարողացանք խաղաղ անհնազանդության միջոցով իշխանություն փոխել։ Մենք պետք է կարողանանք արմատական բարեփոխումներ իրականացնելով, այսուհետ, բացառել որևէ բռնապետության հաստատումը երկրում, որպեսզի խաղաղ կամ զինված պայքարի կարիք չլինի»։
Մարտիրոսյանը հիշեցրեց՝ «Սասնա ծռերի» գործողությունից հետո, երբ համակարգող խումբ ձևավորվեց և որը ցանկանում էր ստեղծված իրավիճակում քաղաքական լուծումներ առաջարկել, իշխանությունները քրեական տարրերի միջոցով՝ ոստիկանության հետ համագործակցելով, ժողովրդի նկատմամբ բիրտ ուժ կիրառեց․ «Ես նկատի ունեմ Սարի թաղում տեղի ունեցած գործողությունները։ Եվ դա այն դեպքում, երբ քաղաքական, հասարակակակն գործիչները փորձում էին թուլ չտալ որևէ զինված բախում»:
