«Միջազգային ֆինանսական կազմակերպություններից ռեգուլյար ձևով մենք արտոնյալ վարկեր վերցնում ենք սկսած 1993-1994թթ-ից և եթե սրան գումարում ենք 10-15 տարի, ապա ստացվում է, որ այդ արտոնյալ վարկերի մարումները մենք սկսել ենք դեռևս 2003-2004թթ-ից։ Այս առումով մեր խնդիրը կայանում է նրանում, որ ներգրավված վարկերի մարման այնպիսի ժամանակացույց ունենանք, որը ամեն բյուջետային տարվա համար նվազագույն բեռ ապահովի բյուջեի ելքերի վրա և որոշ չափով սա մեզ հաջողվում է»,- «Առաջին լրատվական»-ի հետ զրույցում նշեց ՀՀ ֆինանսների նախարարության պետական պարտքի կառավարման վարչության պետ Արշալույս Մարգարյանը՝ խոսելով ՀՀ պետական պարտքի մարումների ժամանակացույցի և վճարման ենթակա գումարների չափի մասին։
Այս համատեքստում Արշալույս Մարգարյանը վստահեցրեց նաև, որ մինչ օրս Հայաստանի Հանրապետությունը ոչ մի անգամ չի ուշացրել իր վարկային պարտավորությունների կատարումը։
«Համոզված կարող եմ ասել, որ մեր ողջ տարածաշրջանում Հայաստանը հազվագյուտ երկիր է, որը պետական պարտքի մարման ժամկետանց պարտավորություն երբևէ չի ունեցել և չենք էլ պատրաստվում ունենալ։
Տարբեր վարկերի գծով յուրաքանչյուր ամիս մենք 2-3 վճարում ենք ունենում, այս մասով որևէ խնդիր չի առաջանում, ինչը վկայում է պետբյուջեի հոսքերի շատ գրագետ պլանավորման մասին։
Ինչ վերաբերում է մեր թողարկած եվրոբոնդերի մարումներին, ապա դրանք մարելու կոնկրետ օր ունեն՝ մեկը վրա է հասնելու 2020թ-ի սեպտեմբերի 30-ին, մյուսը՝ 2025թ-ի մարտի 26-ին և դրանցից յուրաքանչյուրը 500 միլիոն ԱՄՆ դոլար է կազմում»,-մանրամասնեց Մարգարյանը։
Վերջինս տեղեկացրեց նաև, որ 6 միլիարդ ԱՄՆ դոլար արտաքին պարտքի մարումները բաշխված են մինչև 2050թ-ը։
«Քանի դեռ բյուջեն պլանավորվում է դեֆիցիտով, նշանակում է, որ մենք որոշակի չափով ավելացնելու ենք արդեն իսկ գոյություն ունեցող պետական պարտքը, որովհետև այդ դեֆիցիտի էական մասը ամեն տարի ներգրավվում է պարտքի միջոցով, այսինքն բյուջեն պլանավորելիս՝ պլանավորվում են նաև որոշակի գումարներ, որոնք ներգրավվում են արտաքին կամ ներքին պարտքային աղբյուրներից»,-ասաց նա։
Հիշեցնենք, որ ՀՀ պետական պարտքը կազմում է շուրջ 7 միլիարդ դոլար, որից 1 միլիարդը ներքին պարտքն է, իսկ 6 միլիարդը՝ արտաքին։
Մանրամասները՝ տեսանյութում։
