Թերթը գրում է, որ Շիրակի մարզում կարտոֆիլի արտադրությամբ հայտնի Ազատան համայնքի բնակիչները 3-րդ տարին է՝ պաշտպանության նախարարությանը մթերած կարտոֆիլի դիմաց գումարները ստանալ չեն կարողանում. «2007-ի տարեվերջին նախարարության կողմից ընտրված միջնորդ կազմակերպություններն ազատանցիներից 6 միլիոն դրամի կարտոֆիլ են գնել ազգային բանակի համար ու մինչ օրս 3 միլիոն դրամ պարտք են մնում գյուղացիներին: Պաշտպանության նախարարության համար աշխատող միջնորդները, ըստ գյուղացիների, հենց բերքահավաքի ժամանակ են կարտոֆիլը տեղափոխել ու խոստացել մի քանի օրից գումարն ամբողջությամբ փոխանցել Ազատանի գյուղապետարանի հաշվեհամարին:
Բայց մինչ 2009 թվականը գյուղապետարանի հաշվեհամարին գումար չի նստել, Ազատանի ֆերմերներին էլ մթերած կարտոֆիլի դիմաց պարտքը չի վերադարձվել: 2009-ի մարզխորհրդի նիստի ժամանակ, որին մասնակցում էր նաև փոխվարչապետ, տարածքային կառավարման նախարար Արմեն Գևորգյանը, Ազատանի գյուղապետ Վարդան Իկիլիկյանը բարձրացրել է այդ հարցը»,- գրում է թերթը և մեջբերում. «Ճշտել, թե ով է խաբել գյուղացիներին, գումարն էլ վերադարձնել, հակառակ դեպքում Ազատանի բնակիչները դատի կտան պաշտպանության նախարարությանը»,- նշել է Վարդան Իկիլիկյանը:
«Ընդհանուր առմամբ, գյուղապետարանի տվյալներով՝ մի քանի տարի է, ինչ Ազատանի կարտոֆիլի ցանքատարածությունները դատարկ ու չմշակված են մնում, քանի որ գյուղացիները մինչ օրս փակում են այն պարտքերը, որ 2007-ին էին վերցրել ու կարտոֆիլ ցանել: Ազատանի գյուղապետ Վարդան Իկիլիկյանը մեզ հետ զրույցում նշեց, որ ինքը մի քանի անգամ պաշտպանության նախարարություն է այցելել ու փորձել պարզաբանել, թե երբ, ինչ կազմակերպությունների ու ինչքան գումար են փոխանցել գյուղացիներին, բայց ոչ մի սպառիչ պատասխան չի ստանում: Հիմա գյուղապետն ու համայնքաբնակները պատասխանի են սպասում՝ պաշտպանության նախարարությո՞ւնն է իրենց խաբել, թե՞ միջնորդները»,- գրում է «Հրապարակ»-ը: