Սիրիայում հակամարտության հետևանքով աշխարհում կտրուկ մեծացել է հարկադրաբար վերաբնակվողների թիվը: Ընթացիկ տարվա առաջին կեսին իրենց տները լքել են 5.9 մլն մարդ: Այս մասին հաղորդում է ITAR-TASS-ը:
ՄԱԿ-ի՝ փախստականների հարցերով գերագույն հանձնակատարի հոդվածում նշվում է, որ հարկադրաբար վերաբնակեցման ցուցանիշներով՝ «սա վերջին տասնամյակում վատագույն շրջաններից մեկն է»:
Այսպես. ընթացիկ տարվա առաջին 6 ամիսներին աշխարհում փախստականների թիվն ավելացել 1.5 միլիոնով: Հատկապես ճգնաժամային է իրավիճակը Սիրիայում: Հակամարտության պատճառով հարևան երկրներում հունվարից հուլիս ամիսներին ապաստան գտած սիրիացիների թիվը հասել է 1.6 մլն մարդու:
Համաձայն հոդվածի՝ 2012-ին գաղթականների թիվը 2012-ին հասել է 45.2 մլն մարդու, որը վերջին 18 տարիների ընթացքում առավելագույն ցուցանիշն է: ՄԱԿ-ում նախազգուշացնում են, որ, հաշվի առնելով ներկայիս միտումները, 2013-ի արդյունքներով՝ բացասական ռեկորդը կթարմացվի:
Հավելենք, որ ամենից շատ մարդիկ փախչում են Աֆղանստանից: 2012-ին նրանց թիվը հասել է 2.6 մլն մարդու: Նրանցից 1.6 մլն-ն ապաստան է գտել Պակիստանում:
