Գեղարքունիքի մարզի Ներքին Գետաշեն գյուղում հեղափոխությունից հետո կրքերը չեն հանդարտվում։ Բնակիչները հեղափոխությունից հետո մինչ օրս պահանջում են ՀՀԿ-ական գյուղապետ Կարո Գևորգյանի հրաժարականը։ Վերջինս, սակայն, դիմադրում է և ոչ մի կերպ չի ցանկանում հրաժարական տալ՝ հայտարարելով, որ ինքն ընտրված գյուղապետ է և իրեն ոչ մեկ չի կարող գործից հանել։ Մինդեռ, բնակիչները մի քանի անգամ նույնիսկ համայնքապետի հրաժարականի պահանջով գյուղի ճանապարհն են փակել՝ պնդելով, որ Գևորգյանը պետք է հրաժարական տա, քանի որ խրված է կոռուպցիոն սխեմաների մեջ, և եթե իրավապահ մարմինները սկսեն զբաղվել համայնքապետով, ստուգումներ լինեն համայնքապետարանում, ապա Գևորգյանը ուղղակի կհայտնվի քրեակատարողական հիմնարկում։
Գյուղացիների խոսքերով՝ Ներքին Գետաշենի գյուղապետը զբաղված է միայն իր բարեկամներին գյուղում աշխատանքի տեղավորելոկ։ Օրինակ՝ գյուղը երկար տարիներ մանկապարտեզ չի ունեցել։ Միայն 2-3 տարի առաջ նախկին իշխանությունների հետ երկարատև բանակցություններից հետո կառուցվել է մանկապարտեզի նոր, ժամանակակից չափանիշներին համապատասխանող շենք, որը, սակայն, չի գործում, չնայած այն հանգամանքին, որ այն լիովին պատրաստ է շահագործման հանձնելու համար: Մանկապարտեզը շահագործման չի հանձնվում միայն այն պատճառով, որ գյուղապետը սպասում է, որ իր կողմից տնօրեն նշանակված հարսը՝ Արմինե Գևորգյանը, ավարտի ուսումը և վերադառնա գյուղ, որ զբաղեցնի տնօրենի պաշտոնը։ Մինչդեռ, օրենքով մանկապարտեզի տնօրեն նշանակվելու համար նվազագույնը 5 տարի աշխատանքային փորձ է անհրաժեշտ այդ համակարգում։ Իսկ գյուղապետի հարսը դեռ նոր-նոր պետք է ուսումն ավարտի։
Բացի հարսին տնօրեն նշանակելուց, գյուղապետը գյուղի բոլոր հնարավոր ու անհնարին պաշտոններում նշանակել է իր բարեկամներին։ Մասնավորապես, իրեն տեղակալ է նշանակել փեսայի եղբորը` Հակոբ Վարդանյանին։ Գյուղի մշակույթի տան տնօրենի մահից հետո, Գևորգյանը տնօրենի պաշտոնակատար է նշանակել իր աներձագին` Ռոման Թաթոյանին։ Գյուղապետը աշխատանքի է տեղավորել նաև իր հորը՝ Լյովա Գևորգյանին՝ նրան վարձատրելով ամենաբարձր աշխատավարձով։
Ներքինգետաշենցիների խոսքերով՝ 15 տարի շարունակ գյուղապետը աշխատել է միայն իր ու իր ընտանիքի բարեկեցության համար՝ անտեսելով գյուղի բազմաթիվ խնդիրներ։ Իսկ գյուղը շատ խնդիրներ ունի՝ ոռոգման ջրից սկսած, մինչև կառավարության տրամադրած սուբսիդիաներից չօգտվելը։ «Գյուղապետը միայն ծախսեր է ներկայացնում, գումարներ է դուրս գրում բյուջեից, բայց ոչ ոք դրա արդյունքը չի տեսնում։ Ոչ մի արդյունք։ Մենք բոլորս էլ համոզված ենք, որ նա ֆինանսական մեծ չարաշահումներ է թույլ տվել ու տալիս, որով, միանշանակ, պետք է զբաղվեն իրավապահ մարմինները։ Արդեն հերիք է, ինչքան կերել է, հիմա պետք է պատասխան տա դրա համար։ Թե չէ, սաղ իրա բարեկամներն են ամեն տեղ։ Բա վարչապետն ասում էր՝ հեղափոխությունից հետո էլ ծանոթ-բարեկամ չի լինելու։ Ինչի հիմա ոչ մեկ չի ասում՝ տղա ջան, էս ինչ ես անում։ Ինչի ոչ ոք նրա ձեռքից չի բռնում»,- ասացին գյուղացիները՝ հավելելով, որ Կարո Գևորգյանը հեղափոխության օրերին ամենաակտիվ ցույց ցրողն է եղել ու ճնշել գյուղում բողոքի ակցիաները։