Աշխատանքի և սոցիալական հարցերի նախարարությունը համագործակցում է իրաապահ մարմինների՝ թե՛ դատախազության, թե՛ ԱԱԾ-ի և թե՛ ոստիկանության հետ: Այս մասին «Առաջին լրատվական»- ի հետ զրույցում ասաց Աշխատանքի և սոցիալական հարցերի նախարար Մանե Թանդիլյանը՝ հավաստիացնելով, որ քաղաքացիների տրամադրած տեղեկատվությունը հաղորդվում է համապատասխան մարմիններին:
Մանե Թանդիլյանը նաև նշեց, որ նախարարությունում հայտնաբերվել են կոռուպցիոն չարաշահումների մասին փաստեր, նախկինում կիրառվել են հայտնի կոռուպցիոն մեխանիզմներ, դրանք ուսումնասիրության կարիք ունեն և գտնվում են իրավաբանների ուշադրության կենտրոնում:
Նախարարը նաև նշեց, որ ստեղծվել է աշխատանքային խումբ, որի անդամները զբաղված են ոլորտի խնդիրները վեր հանելով և առաջարկներ անելով: Նրա խոսքով՝ մյուս ճանապարհը արմատական բարեփոխման ճանապարհն է:
Մանե Թանդիլյանի դիտարկմամբ՝ քաղաքացիներին տրամադրվող նպաստները հասցեական չեն: Նախարարն ընդգծեց, որ մարդկանց պետք է հղել այն մեսիջը, որ միշտ էլ ավելի ձեռնտու է աշխատել և վաստակել, քան ոչինչ չանելով՝ նպաստ ստանալ:
«Հայաստանում կա 30 տոկոս աղքատություն և 18 տոկոս գործազրկություն. Դա իրողություն է: Մենք գլոբալ հարց լուծելու խնդրի առջև ենք կանգնած՝ ստեղծել այնպիսի պայմաններ, որ քաղաքացիների հմտությունները չսպառվեն և իրացվեն մեր երկրում: Հաճախ՝ կան աշխատանքներ, բայց համապատասխան հմտություններ ունեցող քաղաքացիներ չկան… մենք ունենք գործազրկության ողբալի ցուցանիշ»,- նշեց նախարարը:
Մանրամասն՝ տեսանյութում